Молитва иже во святых отцу нашему Святителю Тихону, Патриарху Московскому и всея Руси Чудотворцу
О, пастырю наш добрый, святый великий патриарше Тихоне, яко град горний ты явился еси - добрые дела твои и доныне светятся пред человеки. Вемы яко ты, предстоя престолу Пресвятые Троицы, велие имаши дерзновение в молитвах пред Господом. Воззри и ныне на нас, грешных и недостойных чад твоих, к тебе бо, яко имущему велие дерзновение пред Творцом всяческих,ныне припадем и усердно молимся:
умоли Господа,да подаст нам решимость стяжать благочестие отцов наших, его же ты стяжал от юности своей. Ты в житии своем ревностный защититель и хранитель истинной веры был еси, помоги и нам незыблему соблюсти веру Православную. Тихая бо душа твоя зело преуспела в божественном смиренномудрии, научи и нас разум наш питать не многомятежной мудростью человеческой, но смиренным познанием воли Божией. Ты пред лицом лютых врагов Христовых Истинного Бога дерзновенно исповедал еси, молитвою своею укрепи нас, молодушных, да и мы всегда и всюду противостанем духу безбожия и льсти. Ей, угодниче Божий, не презри нас, молящихся тебе, ибо не только от бед и скорбей избавление просим, но силы и твёрдости, великодушия и любви просим, дабы переносить оные напасти, восстающие на нас. Испроси нам неослабное терпение даже до конца жития нашего, мир с Господом и грехов отпущение.
Отче святый! украти в стране нашей ветры неверия и смуты, да водворит Господь на земле Российской тишину и благочестие и любовь нелицемерную. Молитвами твоими да сохранит ю от междуусобной брани, да укрепит Святую Церковь нашу Православную, да не оскудеет Она истинными пастырями, добрыми делателями, право правящими слово Евангельской Истины. Упаси и заблудшие овцы стада Христова. Наипаче же моли Господа сил , да возродится Русская Земля святым покаянием и единым сердцем и едиными устами прославит Дивного во святых Своих Бога в Троице славимого Отца и Сына и Святого Духа во веки веков. Аминь.
