Илебездә ел саен октябрьнең соңгы якшәмбесендә автомобильчеләр көне билгеләнә.
Һөнәри бәйрәм уңаеннан гәзит укучыларны шәһәребездә уңышлы эшләп килүче автотранспорт предприятиеләренең берсе белән якыннанрак таныштырасыбыз килә.
... 61 ел элек, 1959 елның мартында РСФСР автомобиль транспорты һәм шоссе юллары министрлыгы боерыгы белән Октябрьский шәһәрендә Туймазы нефть чыгару идарәсенең автотранспорт колоннасы базасында шәһәр һәм шәһәрара маршрутларда пассажирлар йөртүне оештыручы автотранспорт предприятиесе (ПАТП) оештырыла. Яңа предприятиегә 69 берәмлек техника, «Икарус», «ЗИС»-155, «ПАЗ»-650 маркалы автобуслар һәм «ГАЗ»-51» Грузотакси» автомобильләре тапшырыла. Моннан тыш, «Победа» һәм «Москвич»ларда пассажирлар ташучы таксомоторлар колоннасы булдырыла.
Хезмәткәрләрнең гомум саны 425 кешегә (шул исәптән, 137 шофёр) җитә. Бу чорда предприятие автобуслары «Автовокзал — Зает» шәһәр маршрутын хезмәтләндерә һәм нефть чыгару урыннарына вахта белән йөри.
Бүген инде Башкортстан Республикасының «Башавтотранс» дәүләт предприятиесе филиалы — Октябрьский пассажирлар АТП-сында 84 техника берәмлеге исәпләнә: «НЕФАЗ» — 30, «ПАЗ» — 15, «Мерседес-Бенц-СПРИНТЕР 413» — 12, «Мерседес-Бенц-СПРИНТЕР 515» — 10, Форд-Транзит — 9, махсус механика — 8.
ОПАТП директоры Ринат Рәшит улы Газизов сүзләренчә, 2019 елда предприятие тарафыннан 2 728 135 пассажир хезмәтләндерелгән. Көн саен 50 автобус 7 474 кешене ташый. Октябрьский ПАТП-сы халыкка 26 маршрут буенча хезмәт күрсәтә, шул исәптән: шәһәр эчендә — 13, шәһәр янында — 2, шәһәрара маршрутлар — 11.
Предприятиедә пассажирлар йөртү өлкәсендәге эшчәнлекне көйләүче барлык хокукый документлар бар. Кешеләр иминлеге беренче чиратта техниканың төзек һәм водительнең уяу булуыннан тора. Җәмәгать транспортының юл һәлакәтләре һәм имгәнүләрдән башка авариясез эшләвен тәэмин итү өчен ПАТП-да күп эш башкарыла.
Көн саен маршрутка чыгар алдыннан техника да, шофёрлар да «җиде иләк аша үткәрелә». Беренче чиратта водительләр медицина күзәтүе уза. Монда температура үлчәү, гомум физик торышка күзәтү ясау, алкотестер тикшерүе керә. Предприятие механигы тарафыннан автобусларга рейска чыгар алдыннан һәм рейс тәмамлангач техник карау үткәрелә. Барысы да тәртиптә булса, маршрутка чыгарга рөхсәт бирелә.
Әйткәндәй, автобуслар ГЛОНАСС системасы белән тәэмин ителгән, аның ярдәмендә транспорт чарасының нинди маршрут белән барганы күзәтүдә тотыла. ЮХХДИ хезмәткәрләре белән берлектә автопаркта даими тикшерүләр дә үткәрелә. Монда техниканың төзеклеге генә түгел, куркынычсызлык таләпләренең, транспортны эксплуатацияләү кагыйдәләренең үтәлүе дә игътибарга алына, әйтик, куркынычсызлык каешлары эләктереләме, янгын сүндергечләр, аптечкалар бармы, тәгәрмәчләр сезонга туры киләме һ.б. Моннан тыш, маршрутлар буенча юллар, шулай ук линиядәге автобусларның эше һәм хәрәкәт итү графигы үтәлеше тикшерелә.
Шәһәребезнең пассажирларны йөртүче автотранспорт предприятиесендә 200 кешелек коллектив тупланган. Бердәм, югары квалификацияле хезмәткәрләр үз вазыйфаларын зур җаваплылык һәм намус белән башкара. Тәҗрибәле водительләрнең берсе белән якыннанрак танышып үтик. Раил Ахапкин Октябрьский АТП-сында 1999 елдан хезмәт куя.
«Биредә миңа бик ошый, пассажирлар уңайлылыгы, иминлеге өчен барсын да эшләргә тырышам», — ди Раил Риф улы.
Һөнәре буенча 21 елдан артык гомум эш стажына ия водительнең фидакарьлеге җитәкчелек тарафыннан югары бәяләнә, ул елның- елында «Башавтотранс» җәмгыяте, Октябрьский АТП-сы, шәһәр хакимиятенең мактау грамоталары, рәхмәт хатлары белән билгеләнә. Агымдагы елда да Республика көне уңаеннан үткән тантанада Раил Риф улына хезмәт бурычларын нәтиҗәле һәм сыйфатлы башкарганы өчен хакимиятнең рәхмәт хаты тапшырылды.
...Водительләр көн дә ничәмә-ничә чакрым араны узып, кешеләрне укуга, эшкә илтә, өйләренә алып кайта. Алар пассажирларга уңайлы булсын өчен, юлда хәвеф-хәтәрләргә юлыкмас өчен һәрчак уяулык күрсәтә, авырлыклар алдында баш ими.
Хөрмәтле автотранспорт хезмәткәрләрен һөнәри бәйрәмнәре уңаеннан ихлас тәбрикләп, авыр һәм кирәкле эшләрендә уңышлар, юлларда иминлек телибез!