Американская компания представила ботинки, позволяющие человеку с VR-шлемом ходить по виртуальному миру, двигая ногами, но оставаться на месте в реальном мире. Как им это удалось, читайте по-русски здесь. И по коми-пермяцки — ниже.
Перевод новости с сайта N + 1 выполнен для проекта «Языки России», которые создается при поддержке АНО «Институт развития интернета».
Америкаись Ekto компания мыччаліс ботинкиэз, кӧдна VR-шлема мортлӧ лэдзӧны ветлӧтны, коккез вӧрӧтӧмӧн, виртуальнӧй мирӧт, но кольччыны места вылын ӧнняся мирын сідз, что устройствоыс сувтчытӧг бергӧтлӧ ботинок пыдӧсас колесоэсӧ мӧдӧрӧ. Лӧсьӧтіссез вӧзйӧны ассиныс устройствосӧ кыдз компанияэзлӧ продукт, а не кыдз обычнӧй морттэзлӧ гаджет, эта йылісь висьтасьӧ VentureBeat.
Виртуальнӧй реальность ладорын эм эшӧ абу на помӧдз решитӧм проблема, кӧдаын баитсьӧ ӧння мирлӧн имитациялӧн кык аспект йылісь: предметтэзкӧт физическӧй павкӧм йылісь да нылӧн абу лӧсялана ыжда йылісь (виртуальнӧй мирыс помтӧм, а ӧнняыс дзескӧтӧм жырнас). Медодзза проблемасӧ решайтӧны VR-кеписсез отсӧтӧн, кӧдна сьӧктӧтӧны чуннезлісь вӧрӧтӧмсӧ и кывсьӧ сідз, бытьтӧ киэзын быльнӧй предмет. Мӧд проблема сьӧрті тожӧ эмӧсь техническӧй решеннёэз. Ёнжыкасӧ лӧсьӧтлӧны статичнӧй стенддэз, кӧдна вылын эм быдладора котрасян туёк или матын сы дынӧ конструкция, кӧда компенсируйтӧ мортлісь оськӧввезсӧ. Но нія ыджытӧлӧсь и абу лӧсьытӧсь.
Ekto компания мыччаліс компактнӧйжык решеннё – колесоэза ботинкиэз. Быд ботинокыслӧн эм кык тор, кӧднія сулалӧны гӧгрӧс подув вылын. Торресӧ туйӧ паськӧтны, сюйыштны быдлунся кӧмкӧтӧн кок и крепитны кык кӧлӧн. Гӧгрӧс подуллэзас эмӧсь конструкциялӧн шӧр элементтэз: активнӧй да пассивнӧй колесоэз. Ботиноклӧн быд тор вылас крепитӧмӧсь HTC Vive Tracker понда кошшан датчиккез. Нія лэдзӧны точнӧя адззыны ветлӧтӧмсӧ да синхронизируйтны моторыслісь уджсӧ мортлӧн мунӧмыскӧт. Сідзжӧ ботинок вылас крепитӧм вежана аккумулятор.
Кӧр кинкӧ используйтӧ ботиноккезсӧ, то нія адззӧны кытчӧ мунӧ мортыс и лӧсьӧтӧны кытшлісь иньдӧтӧмсӧ мотора колесоэзкӧт. Оськалікӧ ботиноккез уджалӧны сідз: кӧр мортыс лэбтӧ шульга коксӧ и вештӧ сійӧ одзлань, веськыт кокыс жагӧникӧн вуджӧ бӧрӧ сідз, что тальчикӧ шульга кокыс сувтӧ сія жӧ инӧ, кытчӧ сія сувтліс одзжыкся оськӧлӧн. Сідз, мортыс вӧрӧтӧ коккезӧн и лоӧ ветлӧтӧмлӧн иллюзия, но былись сія сулалӧ ӧтік и сія жӧ жырись местаын.
Разработчиккез шуӧны, что ботиноккез колӧны ёнажыксӧ не обычнӧй морттэзлӧ, а компанияэзлӧ, кӧднія чулӧтӧны VR-орсаннэз, мыччалӧммез или виртуальнӧй экскурсияэз. Нія эзӧ шуӧ донсӧ, но висьталісӧ, мый бизнес понда оз ло дона. Компания мыччаліс ботиноккезлісь уджсӧ Half-Life: Alyx орсанлӧн куим минутаа запись пример вылын.
Редакторсянь
Компанияыс эз понды висьтавны ботиноккезлісь сьӧкытасӧ и шуис, что рамаыс керӧм углеволокноись, но демонстрация видзӧтікӧ лоӧ ощущение, бытьтӧ новйыны нійӧс лоӧ сьӧкытӧв. Сідзжӧ, ӧння версияыс уджалӧ жагӧна и оз поддерживайт орсан мирӧт котӧртӧмсӧ. Лоан кадӧ разработчиккез мӧдӧны веськӧтны этӧ недостатоксӧ.
2018 воӧ америкаись туяліссез лӧсьӧтісӧ, натьтӧ, вӧвлытӧм VR-шлема мортлӧн мунӧм понда компенсация метод. Нія велалісӧ адззыны мортлісь саккаддэз (синнэзлӧн чожа вӧрӧтчӧм, кӧр вемыс оз уджав локтан информациякӧт) и эна дженыт кад колассэзӧ бергӧтлыны экран вылын мирсӧ. Бергӧтчӧммез керсьӧны неыджыт угол вылӧ, но жагӧникӧн казявтӧг лэдзӧны мортлӧ вуджны жырын мӧд местаӧ.
Григорий Копиев
Вуджӧтіс Василий Епанов