Текст N + 1 про скифов и сарматов, похожих на современную мордву, мы перевели на мокшанский язык. Это один из двух языков, оказавшихся в переписи населения 2010 года под одним названием — «мордовский язык». Как так вышло и почему это некорректно, смотрите в нашем ролике.
Перевод выполнен для проекта «Языки России», который N + 1 делает при содействии АНО «Институт развития интернета».
Учёнайхненди тяни содаф киммериецнень, скифнень и сарматтнень эвондамасна, тянь квалма азондови Science Advances журналса. Генетикань ширде скифнень мзярошка пялькссна и сарматтне шарсть тяниень мокшэрзятнень и Кельмоширдень Кавказонь нароттнень лангс. Киммериецнень и сарматтнень, улема, марстоннетольхть атянь атясна. Аньцек колмоцьке группатнень ёткста конанцка юронза аф молихть фкя-фкянь эзда.
3,8-3,2 тёжяньшка кизода инголе, бронзань векть песта и кшнинь векста Понтийско-Каспиень степть моданзон лангса эрясь Срубнай культурно-историческяй плямась. Тя культурань ломаттне эрясть аф оцю веленянь. Веленятне ёряфтольхть Уралста сявомок Днепра ляйти молемс. Колмошка тёжянь кизода инголе степть ши валгома ширесонза ушедсть эвондакшнема вастста вастс ётни плямат, тяконь лувкссотольхть киммериецневок. 2, 7 тёжянь кизода инголе степи састь скифне и панезь киммериецнень Малай Азияв. Нилешка сяда киза скифне инь виихнельхть степса, ши валгома ширень Карпататнень эзда ушедомс шинь стяма ширень Алтаи молемс сембе модатне синнетольхть.
Пингонь ётазь эсост кармасть люпштама: ши валгома ширеса –македонецне, шинь стяма ширеса – сарматтне. Арьсематнень коряс, марса скифне и сарматтне степса эрясть мзярошка сяда киза. Аньцек сарматтне стаки шаштсть ши валгома шири, сяс меколи ёфси панезь скифнень эряма вастстост. Мзярошка сяда киза Римскяй империять шинь стяма ширдень китьксонзон лангса синь ульсть инь виихне, аньцек минь эрань нилеце тёжянь кизоть пестонза синь панезь готтнень мархта гуннатне.
Ня нароттнень шачемасна мзярс тонафнеф кальдявста. Тянь сюнеда, кота масторста генетикне, конатненди вятикс арась Стокгольмонь университетста содаф учёнайсь Андерс Готерстром, кярьмодсть тя кизефксти. Синь ванозь-тонафнезь 35 ломаттнень геномснон. Ня ломаттне эрясть минь эрадонк инголе 1, 9 тёжятть кизоста сявомок минь пингонь ниле сятт кизотненди молемс. Колмогемонь ветие ломаттнень ёткста кемголмувотнень ляткссна муфтольхть «срубонь» калмотнень эзда, колмотне киммериецтольхть, кемнилиетне – скифтольхть и вететне – сарматтольхть.
Содавсь, нилецьке группань ломаттне генетикань ширде малатольхть фкя-фкянди. Аньцек тянь лангс апак ватт, эздост фкяське ашель атянь атякс омбоцети. Срубнай культурать мархта сотф ломаттне генетикань пяльде шарсть, фкя ширде, шаржу пингонь охотендайхнень, иможень-мезень кочксихнень лангс, конат эрясть Ши валгома ширдень Евразияса и Ближняй Востокса, омба ширде – тяниень пингонь мокшэрзятненди и Кельме ширдень Кавказонь нароттненди. Киммериецне, кода и срубнай культурань ломаттне, фкя лацотольхть Ши валгома Евразиянь, а стане жа тяниень Россиянь и Казахстанонь степонь модатнень лангса эряйхнень мархта.
Скифнень шачемасна сядонга аф фкя лацонне. Синь ульсь кода явомс ниле пяльксова. Финцне шарсть Кельме ширдень Европаса эряй ломаттненди; омбонцне – Лямбе ширдень Европаннетненди. Колмонцне, кода и срубнай культурань сяда сире ломаттне, шарсть тяниень мокшэрзятненди и Кельме ширдень Кавказонь нароттненди. Нилеце пяльксти кандови скифне шарсть тяниень болгархнень, грекнень, хорваттнень и туркатнень шири. Авторхнень мяльснон коряс, вастста вастс ётни пляматне шоворькшнесть кода фкя вастса эряй нароттнень, стане и лацост ширде сафненьге, кепотьксонди, Равжа морястонь грекнень мархта.
Колмоце группав сувафтф скифне сяка пингть шарсть сарматтнендиге, аф ваномок сянь лангс, што тонатне эрясть степть тона ширесонза. Кой-кона скифне, киммериецне и сарматтне канневсть митохондриальнай гаплогруппатненди, конат кой-мезьса фкя лацоннет Дальняй Востоконь и Центральнай Азиянь эряйхнень мархта.
Генетикнень мяльснон коряс, ётафтф исследованиясь няфтезе: бронзань векть песта и кшниннеть пингста вастста вастс ётни пляматне пяк отькорьхтельхть. Финц нароттне шашфнезь и полафнезь омбонцнень, фатнезь модаснон. Вастста вастс ётни пляматне ашесть лисе срубнай культурань ломаньтналть эзда, но кафцьконь синь фкатольхть атянь атясна.
Аф кунара исследовательхне кочказь-тиезь шаржу и кучка векнень пингста евразиянь степнень эса эряй вастста вастс шашни пляматнень «генетикань картаснон». Авторхне няфтезь, минь пингтонк инголе васенце тёжянь кизоть песта скифне шоворсть гуннатнень мархта, конат лиссть Шинь стяма Азияста.
Статьять тяштезе Екатерина Русаковась.
Мокшень кяльс ётафтозе Марина Аникинась.