У древнейших тетрапод нашли хрящевой скелет и любовь к водному образу жизни, говорится в статье, опубликованной в британском Nature. Если бы эта статья была написана в научном журнале, выходящем в Республике Коми, там бы говорилось, что медваж тетраподъяслӧн лысьӧмыс вӧлӧма гӧчысь, а овлӧмаӧсь найӧ ёнджыкасӧ ваын.
Узнали мы это, потому что перевели новость про тетрапод на коми-зырянский язык для проекта «Языки России». Этот проект создается при поддержке АНО «Институт развития интернета»
372 миллион во сайын олысь нёль кока ловъя лов ёнджыкасӧ уялӧма ваын. Ӧнія крокодилъяс моз, Parmastega aelidae ва веркӧссяньыс кыйӧдӧма сёянсӧ ва дорысь, юӧртӧ Nature. Но, буракӧ, сійӧ абу дыр вермӧма овны косінын, сы вӧсна мый лысьӧмыс кызвыннас вӧлӧма либӧ гӧчысь, либӧ абу на тырвыйӧ чорзьӧма.
Вермас лоны, мый сынӧдӧн лолалысь нёль кокаяс, кодъясысь сёрӧнджык лоӧмаӧсь муын-ваын олысьяс, артмӧмаӧсь яйчиг борда чериясысь. Тыдалӧ, медводдза тетраподъяс (нёль кокаяс) чужӧмаӧсь недыр кад чӧжӧн, некымын миллион воӧн девонса кадколаст помасигӧн. Тӧдса, мый тетраподъяслӧн медваж кок туйясыслы 395 миллион во, а налӧн медваж измӧм колясъясныслы - 380 миллион во. Ни кок туйяссьыс, ни измӧм коляс торъяссьыс эз позь висьтавны, кутшӧм мыгӧраӧсь вӧлӧмаӧсь медводдза нёль кокаяс. Но ми тӧдам, кутшӧмӧсь вӧлӧмаӧсь акантостега да ихтиостега – тетраподъяс, кодъяс овлӧмаӧсь коркӧ 365 да 360-365 миллион во сайын. Девонса мукӧд нёль кокаяслӧн дорысь, налӧн измӧм колясъясныс бура воӧмаӧсь миян кадӧдз.
Ӧні палеонтологъяс тӧдмалӧмаӧсь важджык тетраподлысь мыгӧрсӧ. Россияса, Швецияса, Великобританияса да Латвияса туялысьяс аддзӧмаӧсь 372 миллион во сайын олысь нёль кокалысь коляссӧ да кужӧмаӧсь петкӧдлыны, кутшӧмӧн сійӧ коркӧ вӧлӧма. Пемӧслы сетӧмаӧсь Parmastega aelidae ним, сылӧн колясыс сюрӧма Коми республикаса Сосногорск формацияысь, Россия рытыв-войвыв юкӧнысь. Тетраподлӧн бура кольӧма юр лыыс да пельпомысь лыясыс. Тӧдчана, мый пельпом лысьӧмыс абу ставнас пӧрӧма лыӧ.
Тыдалӧ, мый тайӧ пемӧсыс кызвынсӧ уялӧма ваын. Олӧма куръяын, берегас вӧлӧма тропик быдмӧгъяса шыльыдін. Аэлидлӧн ныр-вомыс вӧлӧма крокодиллӧн кодь: ёсь пиня, клыкъяса, ныр розьяса, син коласыс неыджыд, тушаыс вӧлӧма метр кузьта кымын. Ныр розьясыс висьталӧны, мый девонса тетрапод лолалӧма абу тынас, а нёкчимнас. Син гуранъяс серти кӧ, синмыс видзӧдӧма вывлань. Тайӧ висьталӧ сы йылысь, мый P. aelidae, тыдалӧ, ӧнія крокодилъяс моз, унджык кадсӧ олӧма ва веркӧсын берегсьыс мыйкӧ кыйӧдігмоз. Гашкӧ, P. aelidae кыйӧдіс ва дорсьыс важся нёль кокаяӧс либӧ йӧзви кокаясӧс, кодъяс надзӧн овмӧдчалісны косінӧ. Мӧд боксянь кӧ, ӧдвакӧ сійӧ сёйис сӧмын йӧзви кокаясӧс, а таысь кындзи, аэлидлӧн вӧліны клыкъяс, сідзкӧ, сійӧ, видзӧдӧмпырысь, сёйис и сюрса лыа кыйдӧс. Та вӧсна позьӧ чайтны, мый аэлид вермис кыйӧдны и берегӧ ванас шыбитӧм кулӧм чери.
Кӧть и Parmastega aelidae-лӧн сюрӧма сӧмын юр лыыс да пельпом лыясыс, оз тыдав, мый кулӧм бӧрас лысьӧмсӧ сылысь кодкӧ вӧлі жугӧдӧма ли разӧдӧма. Та вӧсна туялысьяс чайтӧны, мый лысьӧм мукӧд юкӧныс вӧлӧма гӧчысь либӧ абу на тырвыйӧ удитӧма чорзьыны, да та понда миян кадӧдз абу кольӧма. Тайӧ висьталӧ сы йылысь, мый аэлид ӧдвакӧ дыр вермӧма овны косінын. Но буретш пельпом лыясыс висьталӧны, мый аэлидлӧн вӧлӧма нин абу уялан борд, а кок. Мӧдарсянь кӧ, 395 миллион сайын олысь тетраподлӧн кок туйыс висьталӧ сы йылысь, мый кокыс сылӧн вӧлӧма буретш лыысь, ӧд ветлӧдлыны сійӧ вермӧма, мед кӧть и ваӧд. Туялысьяс серти, тайӧ висьталӧ сы йылысь, мый тетрапод сикасъясыс абу ӧтмоза сӧвмӧмаӧсь.
Филогенетическӧй анализ петкӧдліс, мый аэлидъяс вӧлӧмаӧсь мукӧд важ тетраподыслы вокъясӧн, а абу ай-мамӧн.
Водзджык нин палеонтологъяс киритісны чайтӧм, мый тетраподъяс овлӧмаӧсь сӧмын тропик да субтропик климатын. Туялысьяс видлалісны нёль кокаяслысь кык сикас, найӧ овлӧмаӧсь 360 миллион во сайын ӧнія антарктикаса войкытшын.
Екатерина Русакова
Комиöдiс Ольга Баженова