Грустные роботы-свидетели побудили людей заступиться за обиженного робота, писало недавно N + 1 по-русски.
Теперь сообщаем по-удмуртски, что ӝожомем робот-адӟисьёс вӧсь карем эшсы понна адямиосты дурбасьтытӥзы.
Мы перевели новость про роботов для проекта «Языки России», созданного при содействии АНО «Институт развития интернета»
Адямиос ӵемгес вӧсь карем роботъёс пала пырисько, куке адӟо, со дыре мукет роботъёс ӝож мылкыдзэс возьмато шуыса, верало Роботъёслэн, но адямиослэн кусыпъёссылы сӥзем калыккуспо конференциысь (ACM/IEEE) тодосчиос. Мылкыдзэс возьматыны быгатӥсь роботъёслы адямиос лексэс ӧжытгес возьматозы, но роботъёс шергес тӥяськозы, малпало эскерисьёс. Статьяез конференцилэн ужъёсыз пӧлысь лыдӟыны луэ.
Адямиослэн, но роботъёслэн кусыпъёссы ӵемысь зэмос мерлыко кусыпъёслы тупало. Ӵемысь адямиослэн роботъёслы вожзы потэ: соос ожалтӥсько, куддыр жуго соосты. Йель университетысь тодосчиос, но Джо Коннолли (Joe Connolly) кивалтӥсьсы малпазы, адями леклэсь роботъёсты мукет роботъёслэн «жалямзы» юрттоз. Адямиослэн, но роботъёслэн кусыпъёссы адямиослэн кадь бере, роботъёслэн мылкыдзы адямиослэсь эмпатизэс сайкатыны, но роботъёслы дурбасьтыны юрттоз.
Та малпанэз эскерон понна, тодосчиос чаклан ортчытӥзы. Кутӥзы 30 мылкыд карись адямиос пӧлысь огзэ, но пӧртэм буёло блокъёслэсь фигура бичаны куризы. Вӧзаз актёрез пуктӥзы, кудӥз сыӵе ик номыре валасьтэм мылкыд карись муртэз шудӥз. Фигураосты бичаны соослы куинь пичи роботъёс (Anki Cozmo Robot) юрттӥзы. Огез робот кӧня ке янгышъёс лэсьтылӥз — шонертэм блокез сётказ яке детальёсты муз вылэ уськытъяз. Сыӵе дыръёсы актёр юри робот вылэ вожзэ поттылӥз: зуркатъяз сое, йырзэ уллань лэзьяз (синъёсын дисплейзэ) яке кужмысь ӝӧк вылэ сэрпалляз. Со бере робот жалез поттӥсь куара поттылӥз, нош дисплейысь синъёсыз ӝож мылкыдзэ возьматъязы. Мукетыз кык робот яке бордаз кариськыса сыӵе ик реакцизэс возьматъязы (со дыре актёр вералляз «учке, соос жаляло сое»), яке номыр ӧз карылэ.
Эскерисьёс куинь гипотезаез чаклазы: роботъёслэн жалямзы адямиослэсь эмпатизэс сайкатоз; мукет роботъёслэсь ӝож мылкыдзэс адӟыса, актёрлэн лек луэмез адямиослы шимес йӧтоз; жалясь роботъёслы луыса, мукет адямиос актёрез дугдытыны вырозы — кылъёсын яке выросъёсын, яке сюлмаськемзэс возьматыса.
Кӧняез ке адямиос зэм, но роботъёс понна дурбасьтылӥзы: актёрез дугдыны курылӥзы, черектылӥзы, кылсярысь, «Эны!» шуыса, но «Тон солы вӧсь кариськод!», но роботэз киязы басьтылӥзы. Мукет роботъёс вӧсь карем роботлы жалямзэс возьматыку, адямиос солы ӵемгес дурбасьтылӥзы (p < 0,05).
Эскерон бере юаськонын адямиос пусйылӥзы, актер роботъёсын ассэ урод возиз шуыса: актерлэсь лексэ 1-ысен 7 баллозь дунъянын шоро-куспо лыдпус 5,46 балл потӥз, та дунъет кык пӧртэм эскеронын одӥг кадь вал (мылкыдзэс возьматӥсь роботъёсын но, мылкыдзэс возьматӥсьтэмъёсын но). Макем золгес адямиослы уг кельшы вал актёрлэн роботъёсын ассэ урод воземез, сокем ӝожгес вал соослы адӟыны сое, но сокем золгес робот пала дурбасьтэмзы потэ вал (p < 0,05). Эскерон бере валамон луиз, нырысетӥ гипотеза шонер ӧй вал шуыса, актёрлэсь лексэ дунъянын мукет роботъёслэн мылкыдзэс возьматэмзы номыре, но ӧз вошты.
Куинь гипотеза пӧлысь кыкез шонер ӧй вал ке но, тодосчиос возьматӥзы, роботъёслэн реакцизы адями кусыпъёсты воштыны быгатэ, нош роботъёслэн ог-огзэс чакламзы адямиосты соослы дурбасьтытэ, куке кин ке роботэз вӧсь каре. Азьланяз эскеремын луоз, малы озьы луэ.
Адямиос, роботъёсты жалям сяна, оскисько, но соослы, корт эшъёссы куддыр янгышало ке но. Сыӵе малпанэ вуизы тодосчиос, куке «робот-нуисьёсын» эскерон ортчытӥзы: робот тӥяськемын вал, но адямиослы аспӧртэмлыко, но валантэм косонъёс сётъяз, но улонлы кышкыт вайись учыръёсын адямиос солэсь пырик кылзӥськылӥзы.
Перевод выполнила Лукерья Шихова