«Патрик Мелроуз» дип исемләнгән яңа мини-сериал быел май аенда чыкты. Аның анонслары пәйда булуга ук, ул көтелә торган, һичшиксез карарга кирәкле сериаллар исемлекләренә керде. Бенедикт Камбербэтч катнашкан проектлар гел игътибар үзәгендә була инде анысы, ләкин бу очракта сериалның сюжеты да бик мөһим иде. Эш шунда ки, «Патрик Мелроуз» британ язучысы Эдвард Сент-Обинның өлешчә автобиографик китаплары – тетрәндергеч әсәрләре –нигезендә төшерелгән. 5 сериягә язучының 5 китабы сыйдырылган.
Сериалга бер багу белән бөтен игътибарың экранга төбәлә, анда барган вакыйгалар һәм күренешләр, Һаушка иҗат иткән саундтрек һәм актерларның уены сине чынбарлыктан аерып, Патрикның балачагы үткән 60-еллар көньяк Франциясенә илтә, 80-еллар Нью-Йоркында кокаин һәм героин эзләргә мәҗбүр итә, 90-еллар Англиясендә принцесса Маргаретның ямьсез кыланышларын күрсәтә, югары сыйныф җәмгыятенең вакчыллыгы һәм мәгънәсезлеге белән таныштыра. Әмма иң мөһиме шул: без Патрикның шәхес буларак үсешен күзәтәбез.
Балачак ярасының бала шәхесендә нинди эз калдыруы турында бу әсәр. Хәер, бу эз генә түгел, ә үлекләп торган җәрәхәт. Кайбер җәрәхәтләргә пычрак керә дә, ул урын үлекли, ахыр чиктә, ул урынны, әйтик, кул-аякны кисәргә туры килә. Яисә син һәлак буласың инде. Патрик та балачактан бирле кабатлый: «Минем үләсе килә!»
Патрик наркотиклар һәм алкоголь ярдәмендә үз ярасын онытырга теләсә дә, соңрак моның мөмкин түгеллеген аңлый. Вакытлы чаралар ярдәм итми: атасының явызлыгына дучар булган Патрик үзе әти булгач, өлкән Мелроузның кайбер хаталарын кабатлар дәрәҗәгә җитә. Ул гаиләсен, ике баласын калдыра. Чын аңлау вә төшенү ахырда гына, әсәр хронологиясендәге 2005 елның апрелендә генә формалаша һәм ул, кайчандыр сигез яшендә аны тагын көчләргә теләгән әтисенә «Юк!» дип әйткән кебек, аның турындагы караңгы хатирәләргә дә каршылык күрсәтә.
Әни образы да бик мөһим монда. Патрик әтисен күрә алмый, әнисен ул, бер яктан, кызганса, икенче яктан, аңа ачулы булып кала. Соңгы серия, «At Last» китабы, Элеонор Мелроузның җеназасы көнендә булган вакыйгаларга багышлана. Монда без Патрикның әнисенә карата төп шикаятен бик яхшы аңлыйбыз. Үз гомерендә, аеруча соңгы дистә елда бихисап кешегә ярдәм иткән, үз өен дини хәрәкәт вәкилләренә калдырган әни үз баласына кирәк булган ярдәмне күрсәтмәгән.
Китаплар да, сериал да позитив ноктада тәмамлана. Әйткәнемчә, Патрик үсеп җитә һәм «өрәкләр белән аралашудан» баш тарта, хатыны һәм балалары белән мөнәсәбәтләрен яхшырта.
Соңгы флэшбекта 8 яшьлек Патрикның әйткән сүзләре исә бөтен дөньяга аваз булып яңгырый: Nobody should do that to anybody else. Әйе, мондый адәми булмаган кабахәтлек кабатланырга тиеш түгел.
Көньяк Франциянең гүзәл пейзажларын, Камбербэтчның Нью-Йорк урамнары буйлап исәрләнеп йөрүен һәм шул ук вакытта авыр тирән эмоцияләргә бирелүен күрергә теләсәгез – рәхим итегез, сериалны карагыз. Монда әле Дэвид Мелроуз ролен башкарган Һьюго Уивиңгка да игътибар итегез. Ул искиткеч итеп уйный, нәни Патрик – Себастиан Малтцның җан тетрәткеч ихлас уены аркасында, деспот ата образы чыннан да куркыныч булып китә.