Җылы язгы кояш астында иркәләнеп йөрер вакытларга да санаулы көннәр калып бара. Бер рәхәтнең бер михнәте була дигәндәй, нәкъ менә яз айларында табигать белән бергә бер кочак хроник авырулар да уяна. Сәбәпләре аңлашыла — кыштан соң организм көчсезләнгән, яшелчә һәм җиләк җимеш бу чорда витаминнарын инде югалткан. Атмосфера басымының үзгәреп торуы да организмга йогынты ясамый калмаячак.
1. Ашказаны авырулары
Ашказаны җәрәхәте булган кешеләрнең авыруы бу чорда аеруча көчәергә мөмкин. Язын ул иң киң таралган авыруларның берсе ди табиблар. Алар моның сәбәпләрен бүген дә төгәл генә аңлата алмый. Кешенең ач карынга ашказанында авыртулар, күнел болганулар башлана, авызыннан начар ис килә. Гүзәл затлар, җәйгә кадәр тиз арада ябыгыр өчен, диетага утырырга ашыга. Кинәт кенә мондый үзгәрешләргә нинди организм чыдасын ди? Боларның барысы өчен дә ашказанына түләргә туры килә. Шуңа күрә туклануга бик зур әһәмият бирергә кирәк: язгы чорда ачы, артык тозлы, борычлы һәм ысланган ризыкларны, спиртлы эчемлекләрне бөтенләй кулланмаска, тәмәке тартмаска киңәш ителә. Ашказаны авырулы кешеләр көненә 5-6 тапкыр ашарга тиеш. Күпләр яз айларында үзләрен кулда тота белми торганга әйләнә, еш кына кычкырыша, бәхәсләшә, юктан да кызып китә. Табиблар мондый тискәре тойгылар ашказаны авыруларын китереп чыгаруга төп сәбәпче дип кисәтә. Стресс кичерү авыруны көчәйтә генә, шуңа да бу авыруны булдырмас өчен үзеңне тыныч тотарга кирәк.
2. Кискен респиратор авырулар
Алмашынучан һава торышы, көчсез иммунитет һәм авыру кеше белән аз гына вакыт эчендә аралашу да салкын тиюгә, томау барлыкка китерергә мөмкин. Болар барысы да язгы кояшның җылысына алданып, җиңелчә генә киенеп йөрү аркасында барлыкка килә. Бу бигрәк тә капрон оеклар, юка киемнәр киюче хатын-кызларга кагыла. Шуның нәтиҗәсендә сидек куыгының һәм бөерләрнең ялкынсынуы кебек авырулар пәйда була. Дөрес туклану, витаминнар, вирусларга каршы препаратлар кабул итү — болар барысы да вирусларны җиңәргә һәм иммунитетны ныгытырга ярдәм итә. Шәхси гигиена таләпләрен үтәргә кирәк. Урамнан кергәч кулны юу, фатирның тузанын сөртеп тору мөһим. Фатир тәрәзәсен 5 кенә минутка ачып торсаң да, һавадагы микроблар саны кими.
3. Кәеф булмау
Язын төшенкелеккә бирелүчеләр күбәя. Кеше еш кына үзеннән-үзе канәгать булмый. Аның тирә-юньдәгеләр белән аралашасы килми, киләчәге турында уйлаганда башына төрле күнелсез уйлар килә. Депрессиягә тиз бирелә торган кешеләргә табиблар иртәрәк йокларга ятарга, дөрес итеп тукланырга, саф һавада күбрәк йөрергә, спорт белән шөгыльләнергә киңәш итә. Кәефсезлекне җиңәргә йорттагы интерьерны үзгәртү ярдәм итә. Берәр җирдә ял итеп кайту да кәефне күтәрә.
4. Аллергия
Бу иң киң таралган язгы авыруларның берсе. Агачлар бөреләнгән, үсемлекләр чәчәк аткан чорда күпләр күздән яшь агу, төчкерү, томау төшүдән зарлана. Аллергияне 100 ләп үсемлек китереп чыгарырга мөмкин. Бу авыру дәвалауга бик начар бирешә. Табиблар бу чорда көндезге 11 гә кадәр өйдән сирәгрәк чыгарга, кояшлы һәм җилле көнне тәрәзәгә юеш чүпрәк, марля кисәкләре элергә кинәш итә. Өй эченә серкә үтеп керә алмасын өчен аларны ешрак алыштырып торырга кирәк.
5.Тире авырулары
Тире авыруларының кискенләшеп китүе — яз килүне хәбәр итүнең тагын бер билгесе. Язын үсмерләрдә генә түгел, 20 яшьтән алып 40 яшькәчә хатын-кызларның да битенә бетчәләр чыга. Сәбәбе — кыш буена какшаган иммунитет. Бу вакыт май бизләре үзләренең вазыйфаларын үти алмый. Өстәвенә, бу чорда тирегә тискәре йогынты ясаучы микроорганизмнар да активлаша. Сүз демодекоз дип аталган талпан турында бара. Ул йорт тузанында, мендәр мамыгында тереклек итә. Организмның каршы торучанлыгы нык икән, бу талпан әллә ни зыян салмый. Әмма организм нәзберек булса, бит тиресендә вак бетчәләр, кызарулар барлыкка килә, күздә конъюнктивит килеп чыга. Мондый күңелсез хәлләргә юлыкмас өчен, табиблар витаминнар эчәргә, иммунитетны ныгытырга өнди.
Мәрьям Заһиди
"Подписаться" төймәсенә басыгыз!