Охирги бир йилда «Дарё» интернет-нашрида исми-шарифим кўрсатилгани ҳолда бир қанча материалларим чиқди. Шу баҳона бир «Олтин қалам»га топшириб кўрай, дедим. «Шу вақтгача принципларим сабаб топширмаганман!», десам ёлғон бўлади — «Олтин қалам» ва шунга ўхшаш танловларга жуда танқидий кўз билан қараш бир томон, топширгулик материал бўлмаган, шунинг учун ҳам топширмаган. Йўқса, энг кам иш ҳақининг 100 ми, 200 ми баравари тикилган мукофот учун бир ҳовуч мақолаларни папкага солиб, шунчаки ташлаб келиш нима деган гап; омадни синаб кўриш ҳам тақиқланмаган (боз устига, Хушнуд-ки қатнашиб, ютган экан, ман қатнашолмайманми!). Хуллас, ўтган куни материлларни топшириб келдим. Қайси йўналиш бўйича топширяпсиз, деб сўрашмади. Ўзлари кўриб, саралаб олишар балки.
Кейин билсам «Газета.uz»дан Никита Макаренко, «Kun.uz»дан Шуҳрат Шокиржонов ҳам мақолаларини топширибди. Улар ҳам топширганини, топширишини билганимда, қатнашиб ҳам ўтирмасдим. Макаренко кимлиги маълум — «Газета.uz» юзи ва юлдузи, мақолалари француз тилига ҳам таржима қилиниб, Франциянинг катта нашрларида чоп ҳам этиляпти. Журналист Шокиржоновни ҳам танийсиз — Фарғона ҳокимининг панжасига панжа урган «самарқандлик шер», «Журналист Шокиржонов» деган машҳур комикслар серияси қаҳрамони (биринчи серия, иккинчи серия, учинчи серия). Қизиғи, бу йил иккиси ҳам Тожикистонга (алоҳида-алоҳида) бориб, репортажлар тайёрлаб келди. Ҳақиқат бўлса, интернет-журналистика йўналишида шу иккиси 1—2-ўринларни бўлиб олиши керак. «Бувайда тонги» эса бу йил 3-ўринни олаверса ҳам бўлади.
Айтмоқчи, «Бувайда тонги» ва шунга ўхшаш нашрларнинг интернет-журналистика йўналишида мукофот қўлга киритиши ҳақида — мана шундай ҳолатлар «Олтин қалам»да ғолиб ва совриндорлар қандай аниқланишига доир турли шубҳалар, миш-мишлар, хунук гапларнинг тарқалишига (масалан, ўтган йилдаги каби), «Олтин қалам»нинг обрўси пасайишига сабаб бўлади, менимча (агар пасайгулик обрўси бўлса). Ким билсин, балки бу йил танлов бошқачароқ бўлар, интернет-журналистика йўналишида ҳам кўпчилик таниган, билган интернет вакиллари кўпроқ ғолиб чиқар.
Шунақа гаплар. Мукофотга лойиқ кўрилганлар номи 3 май куни эълон қилинади. Макаренко ва Шокиржоновга омад!