Алай йисан сифте кьилера Кьиблепатан Дагъустанда лезгийрин «Леки» тlвар алай мергьяматлувилин фонд пайда хьана. Фондуни кьилиз акъуднавай крар дамах кутадайбур я. Ада вад хиляй кlвалахар кьиле тухузва: игьтияж авайбуруз куьмек гун, образовани, спорт, этномеденият ва жемиятдин кlвалахар. Кьилди ксарини тешкилатри фондуниз гайи пулдин такьатар и хилериз талукь проектар кьилиз акъудуниз серфзава. Фондуник гзаф жегьилар ква ва гьар сада тайин са хиляй крар вилик тухузва. Алай вахтунда Москвада къецепатан нафтадин сервисрин тешкилатра кlвалахзавай Руслан Мегьдиханова, консалтингдин тешкилатдин юрист Гьасан Гьасанова, страховой тешкилатрин кlвалахра тежриба авай карчи Назим Дашдемирова, лезги электрон гафарган туькIуьрай Заур Агъамова, экономикадин илимрин кандидат Фазил Гьасанова, аудитор Гьамид Гьамзатова, хъсан тешкилатчи Фарман Шайдабегова гъил-гъиле гана къени крар кьиле тухузва. Фондунин кьил Гьасан Гьасанов я.
Фондуни асас макьсад яшайишдин жигьетдай куьмек авачирбуруз гъил яргъи авун ятlани, ада акьалтзавай несилдиз спортдин, образованидин рекьяйни алакьдай куьмекар гузва. Алай йисан 23-апрелдиз СтIал Сулейманан райондин мектебра «Илимдиз кам» лишандик кваз математикадай тухвай олимпиададиз такьатрин жигьетдай куьмекай кьве фондуникай сад «Леки» я. Олимпиадада Кьиблепатан районрайни шегьеррай 240-далай гзаф аялри иштиракна. Фондунин векилри туькlуьрай 2016-йисан «Лезги халкьдин чlаварганни» халкь патал хийирлу я. И чlаварганда 12 зурба лезгидикай хайи чlалал малуматар гьатнава.
“Лекидин” проектрикай сад мультфильмаяр лезги чlалаз таржума авун я. И кlвалахар хайи чlал сейли авунин, аялриз жуван чlал хъсандиз чир хьунин мураддалди ийизва. Мультфильмаяр акатайбур ваъ, чпихъ ахлакьдин, эдебдин жигьетдай мана ва ибрет квайбур хкязава. Фондунин векилри алай йисуз 10 мультфильм таржума авун къетlнава.
«Лекидиз» чи халкьдин чIехи арифдар Алкьвадар Гьасанан «Асари Дагъустан» ктаб урус ва лезги чlаларал чапдай ахкъудуник кьил кутаз кlанзава. Ктабдиз сифте гаф кхьин тIвар-ван авай къелемэгьли, алим Низами Абдулгьамидовал ихтибарнава.
Алай йисан апрелдин вацра «Леки» фондуни талукь тешкилатрин куьмекдалди «Михьи район» тlвар алаз Ахцегь, СтIал Сулейман, Рутул, Агъул ва Хив районра чIехи мелер кьиле тухвана. Ана агъзурралди агьалийри гуьгьуьллудаказ иштиракна. Зибилар кlватlун патал фондуни 9 агъзурдалайни гзаф шешелар ва маса герек тир тадаракар къачунвай, абур гадарунин карни тешкилна.
Фондунин векилри спортдин рекьяй чпихъ алакьунар авай жегьилриз жуьреба-жуьре акъажунриз фидай куьмекарни гузва. Алай йисан мартдин вацра армспортдин зурба пагьливан, кьудра жегьилрин арада дуьньядин чемпионвилин, тIвар къачур Эльдар Алискендароваз Россиядин чемпионатдиз финин карда пулдин такьатрин жигьетдай куьмекна. Нетижада Эльдар Алискендаров чемпионатдин приздин сагьиб хьана.
Такьатрин жигьетдай гьалар лугьуз жедай хьтин хъсанбур туширвиляй еке харжияр акъат тийизвай, четин тушир проектар вилик тухузва. Зур йисалайни тlимил вахтунда яшайишдиз талукь проектриз 700 агъзур манатдив агакьна пулдин такьатар чара авуна. Такьатрин жигьетдай ахъавал, михьивал авайвиляй халкьдини ихтибарзава. Вуч крар кьилиз акъуднатlа, гьи хилез гьихьтин такьатар серф авунатlа, проектар патал гьикьван пул кlватlнатlа фондунин сайтдин «Такьатрин гьахъ-гьисабвал» хиле гьар вацра малумарзава.
Мукьвал вахтара хуьрерин мектебар спортдин тадаракралди таъминарунин проект вилик тухуз кlанзава. Фондунин векилри бязи хуьрерин спортзалрин гьалар чкайрал чирнава ва талукь тир чарар министерстводиз ракъурнава. Алай вахтунда гьукуматдин куьмек герек тир мектебрин сиягь тестикьарун давамзава.
Яшайишдин гьалар хъсан тушир, игьтияж авайбурун гъилни кьазва. Икl, Ахцегь райондин Цуругърин хуьряй тир Исмаиловрин хизандин кlвал цlийикlа туькlуьр хъувуниз куьмек гудайвал я. Са гафуналди, гьихьтин четинвилер акьалтзаватlани, фондунин векилри халкьдин абадвални генгвал патал галатун течиз регьимлу, баркаллу зегьмет чlугвазва.
Куругъли ФЕРЗАЛИЕВ