Жуван халкьдин дерин тарихдал ва девлетлу ирсинал дамах ийиз, жув Шарвилидинни Къванцигададин, Вачединни Жаваншаран, Гьажи Давуданни Ярагъ Мегьемедан несил тирди чиз, жув Алпан хьтин гьукумат хьайи, Къавкъаз дагълариз, Каспи гьуьлуьз, лезги кьуьлуьниз машгьур тlварар гайи, асирралди мидяйрин хура гьамиша викlегь яз къалурай лезги халкьдин велед хьунал дамах авуналди, и пак Кьуркьандал гъил эцигна, Аллагьдин михьи тlварцlел, бубайрин сурарал, лезги Намусдал.
За Пак Кьин кьазва хьи:
Инсаф течир кьисметди чун, сагъ са миллет, гужуналди кьве патал пайзавай сергьятдин цlар амай кьван, зи рикlевай хер сагъ хъижедач. Эхир нефесдалди за жуван акьул, къуват, чан лезги халкь садхъувун паталди къурбанд ийида. Миллетдин къайгъуйрилай чпин хийир вине кьаз, жемятдин малдиз гъил ийизвай къуллугъчияр, чпин гафар сад, крар масад тир тапархъанар, еке къуллугъар кьуна анжах чпин асайиш паталди миллетни кваз маса гузвай хаинар, жемятдин кlвал-мал атlузвай угърияр, миллетдин сагъвилиз зиян гузвай анашачияр ва ичкибазар за халкьдин хаталу душманар яз гьисабда. Чилерин-цаварин вилик, Садаллагьдин вилик, зи сирдашрин вилик за кьин кьазва хьи, жуван хивез къачузвай кардин четинвал ва жавабдарвал за жуван фикирдалди гьиссзава ва зун и барка алай пак кардив садан жебирни авачиз, жуван хушуналди эгечlзава. Анжах тек жуван рикlин игьтияждилай гъейри маса са темягьни захъ авач. Эгер за и Пак Кьин чlурайтlа, къуй зи тlварцlел, зи эсил-несилдал ивидалдини чуьхуьз техжер лянет къурай! Къуй зи дуван Садаллагьди ва къенин шагьидри авурай!
Гьар са хаиндиз ажал! Сагърай лезги халкь! Амин!
1991 йис. (Туькlуьрайди: Фейзудин Нагъиев)