Ислам дине тарихыннан мәгълум булганча, сәхабәләр исерткеч эчемлекләр эчкәннән соң оршышып, талашып киткәннәрен күргән Гомәр (р.А.г.) Пәйгамбәребезгә (с.г.в.) мөрәҗәгать итеп әйтә: “Әй Аллаһының Илчесе, зинһар мөселманнар өчен исерткеч эчемлекләр эчүне тый әле!”. Пәйгамбәребез (с.г.в.): “Әй Гомәр, ничек итеп мин, Аллаһыдан вәхий иңмәгән килеш, үз белдегем белән исерткеч эчемлекләр эчүне тыя алыйм, мин бит Аллаһының әмерләрен генә җиткерүчемен”, дип җавап бирә.
Карагыз әле мөхтәрәм милләттәшләр, газиз дин кардәшләрем, Аллаһы Тәгаләнең сөекле Пәйгамбәре (с.г.в.) була торып, кешеләргә зыян сала торган исерткеч эчемлекләрне тыюдан баш тарта, чөнки, үз белдеге белән Аллаһыдан бу хакта вәхий иңми торып, сәхәбәләрнең күңел ачып, исерткеч эчемлекләр эчүенә ачуы килсә дә, “исерткеч эчү хәрам”, дип фәтва бирми. Исерткеч эчемлекләр хакында Аллаһы Тәгалә башта әйткән иде: “Алар синнән хәмер һәм отыш уены хакында сорашалар. Әйт: "Ул нәрсәләрдә зур гөнаһ бар һәм кешеләргә аз гына файдасы да бар, ләкин файдасына караганда гөнаһы зуррак". (2. 219) Соңрак тагы бер аять иңә: “Ий иман китерүчеләр! Исерек килеш, нәрсә сөйләгәнегезне аңлый башламый торып, намазга якын килмәгез!” (4. 43)
Күргәнебезчә, Аллаһы Тәгалә бу ике аятьтә исерткеч эчемлекләр эчүне тыймый. Сәхабәләр инде тулысы белән Пәйгамбәребез Мөхәммәднен (с.г.в.) һәр әйткән сүзен каршылыксыз тыңласалар да, Гомәр (р.А.г.) гең үтенечен үтәп “Хәмер эчү хәрам”, дисә һичшиксез тыңлар иделәр, нәрсә булган инде, исерткеч эчемлекне тыюның нинди начарлыгы булсын?!? Юк, мөхтәрәм милләттәшләр, газиз дин кардәшләрем, Пәйгамбәр чаклы Пәйгамбәр (с.г.в.) була торып та, Аллаһы кушмаган гамәлне кылмый. Ә хәзер уйлап карыйк әле, без соң әллә Пәйгамбәрдән (с.г.в.) дә акыллыракмы? Әллә безнең өчен Раббыбыз Коръәннән башка тагын берәр китап иңдердеме? Ни өчен соң без Аллаһы Тәгалә иңдергән Коръәннең бер аятендә дә күрсәтелмәгән, Пәйгамбәребез дә (с.г.в.) фәтва бирмәгән, эшләп күрсәтмәгән гамәлләр кылабыз? Исең-акылың китәрлек бит җәмәгать.
Пәйгамбәребез (с.г.в.) безгә ике бәйрәм: “Ураза” һәм “Корбан” бәйрәмнәре калдырды. Ә бүгенге баш миләрен Иблис хосусыйлаштырган имамнар халкыбызга нинди генә бәйрәмнәр китереп тоттырмыйлар. Нинди генә “Изге Чишмәләр”гә, нинди генә “Изге каберлекләр”гә алып бармыйлар. Мәрхүмнәрнең нинди генә көннәрен уздырмыйлар. Аллаһы Тәгалә Үзенең камил итеп төзеп биргән ислам динендә нинди гамәлләрне тыйган булса, Пәйгамбәребез (с.г.в.) дингә яңалык кертүчеләрнең җәядән ук атылып чыкканы кебек исламнан очып чыкканы турында кисәтү ясаган булса да, күп кенә имамнарыбыз нәкь шул гамәлләрне кылырга чакыралар гади мөселманнарны. Нинди генә “җавапнамәләр” язып сатмыйлар да, нинди генә “гүр садакалары” уйлап чыгармыйлар, хәтта “Коръән тутыру” хакында белешмә кәгазьләр сатудан да чирканмыйлар.