Бу атнада Netflix атаклы сәяси драма-сериалның соңгы, алтынчы сезонын чыгарды. Беренче эпизодтан ук күңелне җеназадан соңгы халәт хисе биләп ала. Әйтерсең, син мәрхүмне күмгәннән соң бушап калган йортта йөрисең. Әле яңа гына мәрхүмнең тетрәндергеч монологларын тыңлый идең, ә хәзер ул инде салкын җир куенында. Бу мантыйкка сыеша торган хис: сериалның җелеге булган каһарман – Фрэнк Андервуд – вафат.
Президент Фрэнк Андервудның сәяси һәм җисми үлеме Кевин Спейси әфәнденең кино сәнгатендәге вакытлы «үлеме» белән тәңгәл килде. Үрмәкүч сыман сәясмәннең кырык ел капчыкта яткан безләре барыбер тишелде һәм аның кәртләрдән салган корылмасы җимерелә башлады. Спейси үзе дә, Уайнштейн эффектына дучар булып, ничәмә-ничә еллар буена җентекләп яшерелгән серләренең фаш ителүен күрде.
Андервудның «өрәге» безне һәр эпизодта эзәрлекли.
Андервуд вафат булса да, һәр эпизодта без аның «өрәген» очратабыз. Юк, сурәтен, чагылышын түгел. Аяныч гамәлләренең нәтиҗәсе һәм әйтелеп бетә алмаган васыяте белән кабат һәм кабат очрашабыз без. Андервудны оныта алмаган, аның мирасыннан баш тарта алмаган Даг Стэмпер да, вазыйфасын аннан мирас итеп кабул иткән Клэр ханым да шул өрәк белән күрешә.
Хакимлек хакына кылынган коточкыч җинаятьләр алтынчы сезонда да дәвам итә. Бу юлы без Клэр Андервуд кына булдыра алган яңа хәйлә юлларына һәм яңа рәхимсезлекләргә юлыгабыз. Гаҗәп түгел: максатка ирешер өчен барына әзер булган Фрэнкның хатыны да нәкъ шундый кеше булырга тиеш иде.
Эчтәлекне сөйләп бирергә теләмим, әмма янәдән искәртәм: кан коюлар, алдагы сезоннарда тәмамланмаган «җөмләләр»гә нокта кую дәвам итә. Сериалның соңгы күренеше – иң зур нокта, ләкин без шул ноктадан соңгы дөньяның ничек яшәячәген, гомумән, планетаның киләчәген күз алдына да китерә алмыйбыз. Чөнки, аңлашылганча, Президент Клэр ханым – дөньяда иң куркыныч кеше. Салкын, кырыс, максатчан һәм гаять куәтле.
Ахыргы күренеш тетрәндерә: «Башка газап булмаячак», – ди Клэр.
Фрэнк чәчкән җилдән үсеп чыккан гарасатта Клэр Андервуд сынмады.
Кайчандыр Британиядәге уйдырма вакыйгаларга багышланган «House of Cards» романының төп идеясе – безнең капчыкта ятмавы. Сериалда да Андервудлар корган уенчык чынбарлык тар-мар килергә һәм ахыр чиктә аларның икесе дә харап булырга тиеш иде. Хәлбуки, Фрэнк чәчкән җилдән үсеп чыккан гарасатта Клэр Андервуд сынмады. Мин исә бу уенның тулысынча тәмамлануын һәм Клэрның да харап булуын көткән идем.
Гомумән, барлык алты сезон турында сөйләшсәк, мин бихисап тәнкыйтьчеләрнең фикеренә кушылам: House of Cards – сериаллар сәнгатендә иң югары сыйфаттагы әсәрләрнең берсе. АКШның хәзерге заман сәяси тормышын чагылдыра торган сериал «шекспирча» дип әйтерлек тасма булып чыкты.
Әсәрнең нәфислеге, аның эстетик матурлыгы бәяләп бетергесез. Гадәттәгечә, һәр деталь мәгънәгә ия: төсләр, картиналар, интерьер, һава торышы, урыннар. Сериал, телевидение (ә бу очракта – стрим-ширкәт) өчен уйлап чыгарылган жанр булса да, урыны-урыны белән сәхнә әсәрен хәтерләтә.
House of Cards – ачлык һәм карунлык турында төшерелгән сериал. Баш каһарманнар ач: аларга хакимлек, йогынты, абруй, идарә мөмкинлеге җитми дә җитми. Шуңа да алар туктый белми. Кызык, безнең илдә һәм безнең җәмгыятьтә яшәгән хакимлек каруннары туктый алыр микән?