Шәһәрдә һәм предприятиеләрдә спорт белән шөгыльләнү өчен тудырылган шартлар нәтиҗәләрен бирә. Хәбәр иткәнебезчә, безнең яшьләр «Форпост» республика үзәгенең XVIII спартакиадасыннан җиңү белән кайтты.
6 кешедән торган команда яшьләре Әлмәт торба заводында хезмәт куя.
– Безнең барыбыз да спорт белән шөгыльләнә. Футбол да уйныйбыз. Спартакиадага барганда бары тик футбол уенында җиңүне бурыч итеп куйган идек. Көндәшләрнең көчле булуын күрү җиңүгә омтылышны тагын да арттырды, – диде алар.
Әлмәтлеләр беренче көнне үк физик яктан чыныккан, нык ихтыяр көчле булуларын күрсәтә. Спортның 7 төрендә дә торба заводы яшьләре җиңү яулый. Калганнарында исә икенче урын алалар.
Мария Закирова һәркемне сокландыра. Ул Калашников автоматын 32 секундта сүтеп җыя һәм шушы вакыт эчендә бу хакта доклад бирергә дә өлгерә. Спартакиадада иң яхшы нәтиҗә шул була.
– Мин политехникумда укыганда беренче курста хәрби әзерлек дәресләренә йөргән идем. Автомат белән шунда таныштым, атарга да өйрәндем. Күнекмәләр онытылган кебек иде. Ике елда ике тапкыр автомат сүтеп җыйдым, – диде Мария.
Командада ике кыз, дүрт егет. Кызлар футбол, волейбол да уйный, җиңел атлетикада катнаша. Ату буенча да безнең яшьләргә тиң булмый. «Форпост» оператив отрядының беренче командиры булган Андрей Пудов исемендәге кубок Әлмәткә кайта.
Әлеге спартакиадада узган ел да Әлмәт данын завод яшьләре яклый һәм ул чакта икенче урын белән кайта.
Билгеләп үтелгәнчә, предприятиенең территория эчендә үзенең дә спорт залы бар. Эшләүчеләр ел дәвамында спортның 24 төре белән шөгыльләнә, цехлар арасында ярышлар оештырыла. Шулай ук шәһәрдәге башка спорт корылмаларын арендага алып торалар. Төрле ярышларда катнашучыларга кызыксындыру чаралары да каралган.
Әлмәттә мәктәпләр, ссуз һәм вузлар, предприятиеләр буенча барлыгы 88 отряд санала. Быел Татарстанда әлеге хәрәкәт төзелгәнгә 20 ел, киләсе елда безнең шәһәр «Форпост»ына да шуның кадәр була.
Башка яңалыклар белән безнең сайтта таныша аласыз.