Рубаилер

*** Карак чивеш аразы дег хензиг үе, Каш-ла санныг айлар, чылдар – амыдырал… Хонук узун, ынчалза-даа назын кыска. Калгып эрткен чаңгыс шак-даа – кезээ мөңге. #рубаилер #енданбс 21. 08. 25

*** Кадыр сында хая чечээ – башкым ол-дур, Караңгыда чыраан сылдыс – башкым ол-дур, Шуурган-хатка самнаан чиирбей – башкым ол-дур: Каптагайда бар-ла чүве – башкым ол-дур. #рубаилер #енданбс 03. 08. 25

*** Чедир бышпаан эм-даа үнүш – хоран-коржаң. Чедир кылбаан хөй-даа ажыл – оваа-сүрээ. Чедир кыппаан улуг одаг чылыг-даа чок, Чедир билбээн өндүр бодал утка-даа чок. #енданбс #рубаилер 08.08.25

*** Малгаш-балар, хөөлбекти оюп чорза, Мага-бот-даа, идик-хеп-даа арыг болур. Алгыш-кырыш, нүгүл-хопту оюп чорза, Алдар-ат-даа, сеткил-хөөн-даа арыг болур. 02. 08. 25 #рубаилер #енданбс

*** Хоралыг бак чаңчылдардан Хоолулза, адырылза – аас-кежик. Эки чаагай чагыг-сөстү Эдерипсе, чүгленипсе – ажык орук. 12. 06. 25 #рубаилер #енданбс

*** Дарга, башкы, эртемден-даа чазып болур, Даяныпкаш, дагын катап туруп келир. Эртеми хөй – чазыгларның түңнели-дир. Дарга, башкы, эртемден-даа чазып болур. Эрик бустур –  кадыр эл бооп улам бедиир, Эндеп болур – кадыг эр бооп  өзүп келир. Дарга, башкы, эртемден-даа чазып болур, Даяныпкаш, дагын катап туруп келир. 12. 06. 25 #енданбс #триолеттер