Минея, 24 Июня, Кано́н пе́рвый, творе́ние Иоа́нна мона́ха Глас 4 Песнь 1 Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние. Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с. Я́ко у́тро благоле́пно, Со́лнца предтеки́й,/ непло́дныя прозябе́ние пропове́дает я́ве Де́вы Рождество́,/ всей ны́не вселе́нней сия́ет концо́м просвеще́ние благоче́стия и благода́ти...