MEN QULMAN GO'YO Turmush o‘rtog‘im bilan 2022-yil 8-mayda to‘yimiz bo‘ldi. Sovchi orqali tanishganmiz. Dastlab bir-birimizni sevmaganmiz, bir yilgacha shunchaki er-xotin bo‘lib yashaganmiz. Oradan bir yil o‘tib, bir-birimizga bo‘lgan muhabbat uyg‘ondi. Yeru ko‘kka ishonmasdik, bir-birimizdan xabar olib turardik. Qaynonam juda maydagap ayol edi. "Uyindagilar uni olib kelmagan, bunday qilmagan, bu ishni unday qilishi kerak" deb har doim ayb topaverardi. Men kelin bo‘lib kelganimda ovsinim bilan birga turardik. Uning ikki farzandi bor edi. Qaynakam hammadan erta ishga ketib, hammadan kech qaytardi. Qaynonam esa: "Ertalab turib, qaynakangni ishga kuzat. Ovsiningning bolasi bor, u dam olishi kerak. Kechqurun ishdan kelganda kutib ol", deb shart qo‘yardi. Qaynonam bilan tez-tez tortishib qolardik. Men bularning hammasini turmush o‘rtog‘imga aytardim. Avvaliga "Qo‘yaver, sen yaxshisan, sen chidaysan" deb taskin berardi. Lekin bora-bora qaynonamning qiliqlari oshib borardi. Turmush o‘rtog‘im ham yoqtirmay qoldi. "Jonga tegdi, kelib yashagim ham kelmaydi, sening dastingdan" deb gapiradigan bo‘ldi. Orada homilador bo‘ldim, ikki farzand dunyoga keltirdim. Qaynonamning asl yuzi shunda oshkor bo‘ldi. Kechasi bilan ezg‘ilab, yig‘latib chiqardi, ertalab soat 5-da uyg‘otib, bog‘ga ishlashga majbur qilardi. Lekin o‘g‘li bemalol 8-gacha uxlar, "U dam olsin, ishdan charchaydi" deb uni uyg‘otmasdi. Erim ham chiqib yordam ber demasdi. Shunday qilib, oradan 3 yil o‘tdi. Erim bilan oramiz yaxshi, lekin ba'zan gap talashib, urishib qolamiz. Yaqinda erimning boshqa ayol bilan yurganini bilib qoldim. Eng achinarlisi, to‘yimizdan oldin sevib yurgan qizi bilan uch yildan beri yashirincha uchrashib kelarkan. Meni shunchaki uyga qul sifatida olib kelgan ekan. O‘sha qiz ham erga tegib, 1,5 yildan beri turmush qurgan, lekin baribir erim bilan yurarkan. Bunaqalarga nima deyishni ham bilmaysan kishi... Turmush o‘rtog‘im menga yangi iPhone olib, eski telefonini bergandi. Ichidan juda ko‘p ma'lumot chiqdi. Hammasini tozalab bergan, lekin men shubhalanib, kompyuterga olib borib, tiklatdim. U yerda birga tushgan rasmlari, "jonim" deb yozishgan SMSlari chiqdi. Lekin indamadim, sabr qildim, arqonni uzun tashladim. Hozir har kelishini bayramdek kutib olib, 180 gradusga o‘zgardim. Lekin kechasi uxlagach, iPhone’ini ochib, barcha yozishmalarini tekshirib chiqaman. Bugun u qiz bilan necha marta gaplashgan, qayerda uchrashgan — hammasini ko‘rib, skrinshot qilib qo‘ydim. Ertaga dalil qilib, hech qanday bahona qila olmaydigan darajada ushlashni xohlayapman. Ikki farzandim uchun tinch yashab, hech narsa bilmagandek yurishim kerakmi? Yoki turmush o‘rtog‘im bilan ochiqchasiga gaplashib, "Biz yoki u" deb shart qo‘yishim kerakmi? Lekin ishonchim yo‘q. Balki hammasiga qo‘l siltab, ajrashib ketishim kerakdir? O‘sha qizning erining raqami bor menda. Agar unga qo‘ng‘iroq qilib, "Xotiningni yig‘ishtir" desam, janjal chiqib, o‘sha qiz eri bilan ajrashib, men esa erimdan ajrashsam, ularga qulay vaziyat bo‘lib qolmaydimi, deb o‘ylayapman. Erimni qanday qilib bu yo‘ldan qaytarib, yana oilasiga sodiq qilishim mumkin? Qanday maslahat berasiz?