ТИЛЕЙМЕН АЛЛАГЬ (дуа) Ялбараман Бир Аллагьым – тилеймен, Сенден рагьму мен халкъыма гёзлеймен. Етим болгъан миллетиме языкъсын, Башалмансыз къалгъан сирив болмасын. Тюз гьакъылдан бизин Есим айырма, Яратгъаным, бизин къойма къайырмай. Герти ёлгъа бакъдыр бизин Якълайгъан, Сакъла халкъны дагъы бетер балагьдан. Ялбараман Бир Аллагъым – тилеймен, Сенден умут, Сенден таяв излеймен. Шабагьатлы, Саламатлыкъ береген, Буюрагъан, даим Уьстюн гелеген. Жаныбызда къатсын бизин динибиз, Къабул болсун тилевюбюз – Есибиз. Осал къуллар энни бизде тувмасын, Намартлылар ватанымда болмасын. Дослукъ булан оьзден халкъым яшасын, Азатлыгъы даим элни сакълансын. Тувсун нартдай, Къумукъ тюзде уланлар,  Оьз халкъына эл уланы болардай. Ялбараман Бир Аллагьым – тилеймен, Сенден рагьму мен халкъыма гёзлеймен. Етим болгъан миллетиме языкъсын, Башалмансыз къалгъан сирив болмасын. (Англатыв, баянлыкъ - Еси, Есибиз, Яратгъаным, Якълайгъан, Шабагьатлы, Саламатлыкъ береген, Буюрагъан, Уьстюн гелеген – Аллагьны сыйлы атлары). Багьавдин Гьажаматов