Эльвира Докулак. Авам ынак куштары
"Эргим авам манаан тур боор..."
Өндүр-бедик даглар куржаан Өскен-төрээн мээң черим, Өстүрүп каан ынак авам, Өөнде мени манап орар. Авайымның ай дег ак өөн Алдын хүнүм чылдып хүнзээр, Ааттынган кавайымны Авам күжүр камнап чоруур. Частың башкы айы-биле Чанар куштар келир душта, Чылыг шайын кудуп алган, Сындан авам харап хүнзээр...
А. Даржай. Авамга чечээм
Боодал сонет 1 Ыржым дүннүң шыксыг сериин, тааланчыын. Ынай чашта кавайымны чайгаан ышкаш, Өртемчейниң кайы-ла бир сылдызындан Өпей ырың куттулуп тур, ынак авай. Өрээлимниң чырык-чылыы дендей берди – Өөрүшкүм белек алган хензиг чаш-ла. Караңгы дүн ханызындан дириг хевээр Караам орта хүлүмзүрүп көстүп келдиң. Ыржым өттүр чедип келген овуруңну Ынакшылдыг кайгап ор мен, эргим авай. Сеткилимниң он беш янзы чечектерин Сеңээ сунайн, ооң ады – Сонет чечээ. Ындын алып, кыңгыт кылдыр бадырыптайн, Ырлыг чечээм аялгазын дыңна, авай...