Кіші жүз ханы - Әбілқайырға баға беруде кәсіби тарихшылардың өзі қақ жарылатындығы белгілі. Біреулер оны асқақтатса, келесі біреулер даттайды. Мұндай көзқарасқа қарамастан Әбілқайыр хан көзі тірісінде мойындалып, ғазы-бахадүр атанғаны белгілі. Мұндай атақпен қазақ тарихында үш хан ғана белгілі. Бұл: 1. Тәуке хан 2. Әбілқайыр хан 3. Нұралы хан Бірақ бұл тізімге Нұралы ханды қосатындарда, қоспайтындарда бар. Дегенімен, 1725 жылы Түркістанды қорғап, Бұланты мен Аңырақайда жоңғар мен қалмақты жеңген - Әбілқайыр хан екендігін баса атап өткен жөн...

Әбілқайыр ханның Қазақ хандығының Кіші жүз бөлігін - Ресей империясының құрамына кіргізуіне ішкі жағдай әсер еткені сөзсіз. Тәуке ханның қайтыс болуымен үш жүзде - үш ханның пайда болуы Қазақ хандығын бейорталықтандырылған, конфедеративтік бірлестікке айналдырды. Әрбір жүзде Тәуелсіз хандардың сайлануы - Аға ханның мәртебесін әлсіретті. Аға хан билігі номиналды, символдық бейнеге айналды. Әрине, Аға хан мәртебесіне ие Болат ханда - бүкілқазақ хандығының құрылтай жиналысын шақыру, құрылтай жиналысы аясында төтенше шаралар қабылдауға құқығы сақталды...