Куйыкысь Валерий Туктамышевич Бегашев — историен дышетӥсь. Со понна Кукмор ёросын улӥсь удмуртъёслэн историзы но лулчеберетсы кемалась ини тунсыко пото. Валерий Туктамышевич соосты пыр-поч эскере, соин ик удмуртъёслэн сям-йылолъёссы сярысь со трос тодэ. Но эшшо но тросгес — интынимъёс сярысь. Со паймымон валэктонъёс сётыны быгатэ тапалась гуртъёслэн, шуръёслэн, нюкъёслэн но бусыослэн нимъёссы пумысен. Котькудӥз соос татын азьвыл улэм калыкен герӟаськемын луо. Кылсярысь, со туж тунсыко валэктэ «ошмес» кыллэсь кылдэмзэ. — Кытын ву, отын улон, — вера со. — Ву — со улонлэн инъетэз. Вашкала удмуртъёс туж визьмоесь философъёс вылӥллям ук...