Якія традыцыі класікаў беларускай літаратуры перадаюцца ў іх сем’ях з пакалення ў пакаленне, даведалася карэспандэнт агенцтва «Мiнск-Навiны». Iван Шамякiн з дачкой Таццянай i ўнучкай Машай — Іван Шамякін пісаў заўсёды пра тое, што добра ведаў. Шмат збіраў матэрыялаў, гаварыў з людзьмі. А часам і ўласны досвед меў пра тыя ці іншыя бакі жыцця. Скажам, пераканаўчыя вобразы кіраўнікоў выпісваў, бо і сам займаў кіруючыя пасады. Дарэчы, і ўрбаністыка была яму зусім не чужой сферай: да таго як стаць пісьменнікам, скончыў тэхнікум у галіне будаўніцтва. Ствараў пранікнёныя вобразы бацькоў, бо сам выхаваў чацвярых дзяцей і быў вельмі добрым бацькам і дзядулем...