Башҡорт телендә пьесалар йыйынтығы сыҡты Заһир Исмәғилев исемендәге Өфө дәүләт сәнғәт институтының уҡыу театрында балалар өсөн башҡорт телендә «Балалар сәхнәһе» пьесалар йыйынтығының исем туйы үтте. Баҫманың авторы һәм төҙөүсеһе - филология фәндәре кандидаты, Өфө дәүләт сәнғәт институтының режиссура һәм актер оҫталығы кафедраһы доценты, Салауат Юлаев исемендәге дәүләт премияһы лауреаты, танылған яҡташыбыҙ Гөлсәсәк Саламатова. Әйтеүҙәренсә, был баҫманы мәктәп театр коллективтары, театр студиялары етәкселәренә ярҙам итеү өсөн уҡыу-методик әсбап тип атарға мөмкин. Тиҙҙән китап республиканың бөтә райондарына таратыласаҡ. Ул башҡорт халҡының мәҙәни мираҫын һаҡлау һәм популярлаштырыу эшенә ҙур өлөш индерәсәк.