4761 подписчик
АДЫГ ДЫРГАА
Адыг дыргаа-биле кандыг-даа бергелерни ажып эртер дижир. Тыва чаңчыл езугаар өреге бүрүзүнге адыг дыргаа албан турар.
Шаандагы тывалар адыг дыргаан хай-халапты чайладыр, аарыг-аржыкты эмнээр-домнаар болгаш ылаңгыя уруг-дарыгның амы-тынын айыыл-халаптан чайладыр күчүлүг эт кылдыр шыгжап чорааннар.
Бир эвес долу дүжер деп барган болза, өгнүң эр ээзи дашкаар үнгеш, сүртенчиг кылдыр сыгырып-сыгырып, бажыңның кырынга адыг дыргаан чаяр болза, долу олаа кавыга дүшпейн баар дижир.
Бир эвес кавайда чаш уруг хенертен аакталып ыглаан болза, адыг дыргаан хаваанга дегзиптерге, удуй бээр дижир.
Бир эвес азалар чаш уругнуң амы-тынынга кыжанып келир болза, өгнүң эр-даа ээзи, кыс-даа ээзи адыг дыргаан тудуп алгаш, өгнү үш долгандыр хүнгээр эргилдир дескинер болза, удур келген өлүм-чидим ала-чайгаар тайлы бээр дижир.
Адыг дыргаан эдилеп чоруур өгге багай чүве болбас дижир.
М. Кенин-Лопсан. Тыва чоннуң буруңгу ужурлары.
#хоолга
Около минуты
17 марта