4750 подписчиков
💥"Тиилелге" спортчу-культура төвүнүң ажыдыышкыны
📢Каа-Хем суурда "Тиилелге" спортчу-культура төвүн Улуг Тиилелгениң 80 чылында ажытканы Тыва Республикада чугула болуушкун болган. Чаа спортчу-культура төвүн "Тиилелге" деп адааны Ада-чурттуң Улуг дайынынга немец фашизмден Төрээн чуртту камгалап, амы-тынындан маадырлыы-биле чарылган болгаш амгы үеде бистиң аравыста бар дайынның хоочуннарынга мөгейигни көргүзүп турары болур. Улуг спорт комплекизиниң ажыдыышкыны "Тулчуушкунче" деп ырының күүселдези болгаш Тиилелгениң тугун залче чалап кииргени-биле эгелээн.
4500 олуттуг улуг спортчу-культура төвүнүң ажыдыышкынынга келгеннерниң чамдыызы олуттарга сыңышпайн, туруп алгаш, байырлыг ажыдыышкынны сонуургап көргеннер.
Тываның Баштыңы Владислав Ховалыг "Тиилелге" спортчу-культура төвү республикага спортту болгаш культураны улам сайзырадырынга улуг ужур-дузалыг боорун, ол келир үеде Россия болгаш делегей чергелиг маргылдааларның шөлү апарып, аңаа бистиң спортчуларывыс тиилелгелерни чедип алырын демдеглеп, Тываның чурттакчыларынга, эң ылаңгыя спортчуларга бо чугула болуушкун-биле байырны чедирген.
Спортчу-культура төвүнүң кол ареназынга бичии болгаш аныяк салгалдың спортчу оолдар, уруглары спортчу көргүзүглерни чыылганнарга бараалгаткан.
"Тываның спортчу элита—2025" деп байырлал ёзулалының үезинде республикага спортту сайзырадырынга улуг үлүг-хуузун киирген күш-культура башкыларын, тренерлерни, Россия болгаш делегей чергелиг маргылдааларга чайынналчак тиилелгелерни чаалап ап, Тываны алдаржыткан спортчуларга 30 муңдан 1 сая рубль чедир акша шаңналдарының сертификаттарын тывыскан.
Спортту чырыдып турар массалыг информация чепсектерин база шаңнап мактаан. Спортту эң эки чырыткан деп үнелелге "Тывамедиагрупп" төлептиг болган.
«Шындан».
1 минута
21 декабря