4750 подписчиков
💥СҮТТҮГ ШАЙЫМ
Өгбелерим буянындан дамчып келген
Өремелиг сүттүг шайым таан чаагай.
Өөрүшкүнү сөңневишаан сергедиптер,
Өргүн чонум чеми болган сүттүг шайым.
Эртен эрте туруп келгеш, хүннү уткуп,
Эскен шайым саарып, сүттеп, үстүн куткаш,
Сүлде-сүзүк, буян күзеп, чалбарбышаан,
Сүттүг шайым үстүн өргүүр чаңчылдыг мен.
Өг деп чараш өргээвиске чыглып келгеш,
Өремелиг сүттүг шайны аартап оргаш,
Сагыш-сеткил өөрүшкүзүн үлешпишаан,
Саадавайн төндүр ижер, сүттүг шайым.
Сүүзүннүг сүттүг шайым аартап оргаш,
Сагыжымга авам, ачам бо-ла кирер
Сүттүг шайның изиг бузун буруладыр
Сенче, менче сунуп бээри хүндүткел-дир.
Аккыр сүттүг шайым амданыындан
Аарыг деп сөс ала-чайгаар эстип чидер
Деривисти төгүлдүр-ле аартап ижер,
Дендии чаагай ижиртингир, сүттүг шайым.
Алефтина Адышаа.
#тывачогаал
Около минуты
17 октября