9 подписчиков
Благоверному князю Александру Невскому
Тропарь святому, глас 4
Позна́й свою́ бра́тию, росси́йский Ио́сифе,/ не в Еги́пте, но на Небеси́ ца́рствующий,/ благове́рный кня́же Алекса́ндре,/ и приими моле́ния их,/ умножа́я жи́та лю́дем плодоно́сием земли́ твоея́,/ гра́ды влады́чествия твоего́ огражда́я моле́нием// и правосла́вным христиа́ном на сопроти́вныя спобо́рствуя.
Тропарь благодарственный, глас 8
Благослове́н еси́, Христе́ Бо́же наш,/ И́же неве́дущия ны во бра́ни прему́дрыя явле́й,/ дарова́в нам кре́пость и си́лу благода́ти Твоея́,/ избра́вый уде́л по се́рдцу Твоему́,/ Правосла́вную Це́рковь Ру́сскую,/ и укрепи́вый му́жеством подвиза́ющее во́инство;/ ея́же ра́ди си́ми Росси́и мир Твой дарова́вый,/ Человеколю́бче, сла́ва Тебе́.
Кондак святому, глас 4
Я́коже сро́дницы твои́ Бори́с и Глеб/ яви́шася Тебе́ с Небесе́ в по́мощь,/ подвиза́ющемуся на Ве́лгера све́йскаго и во́ев его́,/ та́ко и ты ны́не,/ блаже́нне Алекса́ндре,/ прииди́ в по́мощь Твои́м сро́дником// и побори́ борю́щия ны.
Кондак благодарственный, глас 8
Укрепи́вый Дави́да на Голиа́фа,/ укрепи́л еси́ и во́инство Росси́йское,/ в простоте́ се́рдца служа́щее Ти/ и о и́мени Твое́м подвиза́ющееся,/ благодея́ния Твоя́ прославля́ющее,/ щедро́ты Твоя́ сим дарова́л еси́, Христе́ Бо́же;/ Ты бо наде́жда на́ша, и спасе́ние, и непобеди́мая побе́да.
Величание
Велича́ем тя,/ благове́рный кня́же Алекса́ндре,/ и чтим святу́ю па́мять твою́,/ ты бо мо́лиши о нас / Христа́ Бо́га на́шего.
Молитва
О святы́й благове́рный кня́же Алекса́ндре! При́зри ми́лостивно на ны, недосто́йныя рабы́ Бо́жии (имена), и исхода́тайствуй нам житие́ ти́хое и безмяте́жное, и к ве́чному Ца́рствию ше́ствие неукло́нное твои́м предста́тельством устро́й нам, да сохрани́т нас Госпо́дь Бог Свое́ю благода́тию в ми́ре, здра́вии, долгоде́нствии и вся́ком благополу́чии в до́лжайшая ле́та, да при́сно сла́вим и благослови́м Бо́га в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.
1 минута
12 сентября 2024