9 подписчиков
Пресвятой Богородице пред иконой Ее «Умягчение злых сердец» («Семистрельной»)
Тропарь, глас 5
Умягчи́ на́ша зла́я сердца́, Богоро́дице,/ и напа́сти ненави́дящих нас угаси́,/ и вся́кую тесноту́ души́ на́шея разреши́,/ на Твой бо святы́й о́браз взира́юще,/ Твои́м страда́нием и милосе́рдием о нас умиля́емся/ и ра́ны Твоя́ лобыза́ем,/ стрел же на́ших, Тя терза́ющих, ужаса́емся./ Не даждь нам, Ма́ти Благосе́рдая,/ в жестокосе́рдии на́шем и от жестокосе́рдия бли́жних поги́бнути,/ Ты бо еси́ вои́стину злых серде́ц умягче́ние.
Кондак, глас 2
Благода́тию Твое́ю, Влады́чице,/ умягчи́ сердца́ злоде́ев,/ низпосли́ благоде́телей,/ соблюда́ющи их от вся́каго зла,/ благомоля́щимся Ти усе́рдно/ пред честны́ми ико́нами Твои́ми.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.
Молитва
О Многоско́рбная Ма́ти Бо́жия, превы́шшая всех дще́рей земли́ по чистоте́ Свое́й и по мно́жеству страда́ний, Тобо́ю на земли́ пренесе́нных! Приими́ многоболе́зненная воздыха́ния на́ша и сохрани́ нас под кро́вом Твоея́ ми́лости, ина́го бо прибе́жища и те́плаго предста́тельства, ра́зве Тебе́, не ве́мы, но, я́ко дерзнове́ние иму́щи к Иже от Тебе́ Рожде́нному, помози́ и спаси́ ны моли́твами Свои́ми, да непреткнове́нно дости́гнем Ца́рствия Небе́снаго, иде́же со все́ми святы́ми бу́дем воспева́ти хвалу́ в Тро́ице Еди́ному Бо́гу, всегда́, ны́не, и при́сно, и во ве́ки веко́в. Ами́нь.
1 минута
26 августа 2024