27 тыс подписчиков
✒️ На нашем сайте запущен специальный раздел для старейшей ненецкой газеты «Няръяна Ӈэрм». В нем публикуются новости на ненецком языке.👇
❄️ Каԓитана” ныптаку”
Таӈичохона дёԓеԓьш чепьмантуӈ неԓьня ныптаку». Харампуровская общинахана калитана» мансдянтуӈ дет ӈайта дялямтуӈ мэӈаш». Чуки похона Пуровский’ районхана ӈайта община ӈопт кадяш», ӈокна мансԓаш чепьӈаш». Харампуровская общинахана няхаԓ дëнаԓ ӈок мансԓанатуӈ.
Каймы похона каԓитана» ӈопшеԓ ӈуп дëнаԓкат ва’та тонн» каԓи» планыхинтоӈ миӈаш». Четаӈ мансдянтуӈ дет тонԓюта праздник’ «День рыбака» мэмантуӈ мэт, общинахана мансԓанна» каԓьтуӈ диԓишатуӈ дятуӈ няна ӈайта каԓтыхи» ӈомаш». Пуровский’ районхана каԓитанаӈ дяԓям Толькахана, Ханымейхана, Каԓпюԓкана манԓе мэӈатоньш».
Каԓитани» мансдяӈ дет тонԓюта дяԓян Каԓпюԓкана меԓ дюԓкикат ӈанатайташ». Ӈыдихийтуӈ шеԓ дякуӈ ԓаӈкан ненэй мяту» меӈаш», мячинчетуӈ ӈамԓат пиԓиӈаш». Чики дяԓяхана каԓитана» неша шичитуӈ поздравиймантуӈ мэт томы» веԓвхат куԓкаԓи» хома вачи» намтӈаш». Неша» пуӈ дямпхана каԓиташту». Чейня каԓиташ чепьмантуӈ неԓьня мансдянтуӈ дет ӈайта ӈайвачетуӈ шеԓтапёнԓашту». Поӈка», нямсахи» -таԓьша каԓиташ мэчитутуӈ миԓвутуӈ хынԓуԓьшту», каԓитуӈ кадяԓт мешту», дюнтуӈ пят шеԓташту». Дяхаӈ вит кааммахат манԓе нюча дяку» дёмпёш чепяшту». Четаӈ каԓиташ чепьмантуӈ неԓьня ныптаку». Праздникан чуват мэна» неша» мят чеԓ”самыӈ томай». Праздникан томы» нешади» хомана ныптакомаӈ мэт чики дяԓяхана Каԓпюԓкана куԓкаԓи» конкурсу» шеԓтаӈаш». Касама» нюӈк ӈаймямтуӈ, нэхэмтуӈ конуԓпёшь поӈкнатуӈ мянаԓяш».
Вальӈанохана ԓапяташ мянаԓяш», нэхэԓумпиш», ха’муԓяш». Вальӈанохана мянаԓта» нешади» поӈкна ӈайвахай местам Сергей Егорович Агичев канаӈата. Касами» мянаԓьш шана’котан неӈи» ӈупчики поӈкнатуӈ мянаԓяш». Пытоӈ кукинтуӈ меԓьмана каԓям пӭхэмам манысаԓяш». Пӭхэнамам чедимяна неӈи» куптахаԓт ниш’мы каԓи» мимчидятуӈ, пӭхэдятуӈ. Пӭхэнаш ӈайвахай местам’ Татьяна Егоровна Пяк канаӈата. Кынуман ха’та» ӈупчики поӈкнатуӈ мянаԓяш», нешаӈ ватамана кынсу» мэӈаш». Чуки похона Каԓпюԓкана «Снежный» нимита клубхана мансԓанна» деты мянаԓмам’ — ӈашки ӈупу» дет ӈайта «Конкурс колыбелей» шеԓтаӈаш». Мянаԓман ха’та чупей» чики конкурсан хомана ӈанатамэт. Куԓкаԓи» мэкатамна пытыԓмы» ӈупу» тадяӈаш».
Чики конкурс’хана мянаԓьш Валентина Кауловна Айваседо нэхэԓя. Ӈаԓка нетуӈ мянаԓтан, ӈашкиуди» ӈупчики куԓкаԓи» шана’кохона» шана’куш». Праздниктуӈ хитамахаты мянаԓьш нэхэԓмы», ӈайвахай местам’ канамы» тотуӈ мячисы» няамӈаш». Мансдянтуӈ дет ӈайта праздникхана каԓитана» неша» хомана ныптакуш». Таӈичохона пытоӈ таньше ныптакош шан’ ӈудютоӈ дякуты, дёԓеԓьш чепьмахататоӈ мансдетоӈ ӈука» ӈайты». Чуки похона Харампуровская общинахана каԓитана» ӈопшеԓ дёнаԓкат ва’та тонна каԓи» катаваньш мэӈа». Таӈи путинаӈ чепьмахат писамэй мансԓаштоны».
Лариса Айваседо патмы
2 минуты
19 июня 2024