17 подписчиков
Ултрабинафша нурларидан қандай ҳимояланиш мумкин?
☀️ Сўнги кунларда республикамиз бўйлаб ҳаво ҳарорати сезиларли даражада кўтарилгани кузатиляпти. Аномал иссиқдан қандай ҳимояланиш мумкин? Ултрабинафша нурлари инсон саломатлиги учун қай даражада хавфли?
Ёз фаслида одамлар иссиқ, қуруқ ва қуёшли об-ҳаводан паноҳ излаб қолади. Бундай пайтда айниқса шаҳар аҳолиси анча қийналиб қолади, чунки шаҳарларда транспорт кўп ҳаракатланади, ишлаб чиқариш ривожланган.
Кучли терлаш туфайли организмдаги сув ва туз мувозанати бузилади, натижада мушак ҳужайраларининг озиқланиши ва организмнинг фаолияти ёмонлашади ҳамда юрак-қон томир хуружи ҳолати ортади. Агар иссиқ об-ҳаво сизга таъсир қилиб улгурган бўлса, ҳарорат кўтарилиши, пульс тезлашиши, бош айланиши ва кўнгил айниши ҳолатлари пайдо бўлади.
✅ Иссиқда сувсизланишни олдини олиш учун кўпроқ тоза сув ичиш керак. Газли ичимликлар ва лимонадлардан эса воз кечиш лозим. Улар иссиқда ёқимли туюлгани билан, буйрак ва жигарни ишдан чиқариши мумкин. Чунки иссиқ об-ҳаво пайтида буйраклардаги юк кескин ошади.
Иссиқ шароитда ишлаганда вақти-вақти билан имкон даражасида салқин жойда дам олиш, иш жойларида совутгичлар ўрнатиш ёзнинг жазирама кунларини бир мунча енгил ўтишини таъминлайди.
Бундан ташқари офтобдан сақланиш учун турли табиий ва синтетик крем ва косметик воситалар мавжуд бўлиб, улар А ва Б ултрабинафша нурларидан ҳимоя қилишига қараб фарқланади. Бу воситалар фотопротекторлар деб аталади.
Фотопротекторлар таъсир механизмига қараб кимёвий (фильтрлар) ва минерал (экран) турларига бўлинади. Нурлардан ҳимояланиш даражаси – офтобдан сақланиш омили, яъни СПФ билан ўлчанади. Бизнинг иқлим шароитимизда албатта СПФ 50 дан паст бўлмаган офтобдан сақланувчи воситаларни ишлатиш мақсадга мувофиқдир. Шуни алоҳида таъкидлаш лозимки, бундай воситаларни харид қилишда албатта ана шу жиҳатларга эътибор беринг.
📌 Ҳаддан зиёд қуёшда юриш тери саратонига учраш эҳтимолини оширади. Бундай пайтда ултрабинафша нурлардан ҳимояланиш керак бўлади. Бироқ, бу нурларнинг зарари терига нисбатан кўзларимизга тезроқ таъсир ўтказиши мумкин.
❗️Ултрабинафша нурларининг давомий таъсири катарактанинг келиб чиқишига, у эса ўз навбатида кўз нурларини бутунлай йўқолишига сабаб бўлади. Тери саратони юзага келиши учун анча вақт талаб этилса, кўзларга зарар етказишда ултрабинафша нурларининг оз миқдори ҳам етарли ҳисобланади. Шунинг учун кўзларимизни қуёшдан ҳимояловчи кўзойнак билан асраб-авайлаш лозим.
Каналимизга обуна бўлинг ва энг сўнгги янгиликларни кузатиб боринг
2 минуты
19 июня 2024