25 тыс подписчиков
✒️ На нашем сайте запущен специальный раздел для старейшей ненецкой газеты «Няръяна Ӈэрм». В нем публикуются новости на ненецком языке.👇
❄️ Салабава’’ мюселъй’’
Тандая’ Салехард’ тер’’ яхам’ манэсарманзь хан’’ӈаць. Неновна таня’ тэв’’махад ӈамгэхэрт нензалмы салаба яӈговысь. Тэрихив варда и’’ӈэ хэвысь, сабе макабтёда салабам’ ӈани’ ниваць манэс’’.
Тецьда нум’ ӈэбта ӈод’’ ма’’лёвы ненэця’ ӈули’’ ӈокаць. Ӈэрм’ тер’’ ненэцяӈгаваӈэ нянана’’ тикы теневана сер’’ма’’. Ӈани’’ хэвняд ядэртахав’’ тарцям’ нивы’’ манэпавэхэ’’на илека, мэкад то’’олха. Тюку по’ ӈули’’ яха’ вархана мэваць. Марад’ тер’’ мяд’ терсавэй товыць. Ид’ варувна ядэрӈаць. Сё мэтаха’’ инзелець, таранаха’’ сырӈаць.
Ид’ хэвхана мятрев’ пи ӈонаць. Хусувэй товы ненэць’ пя’ ютеракохона падна пирӈадась. По’ ямбан’ сёнзяндо’ мю’ ма’’лёвы’’, иламдо’ табтомдамбада вэвакудо’ падыбиць. Илаӈгана хуркари’’ вэва’’ сер’’ ӈадиберцеты’’. Тикахана мэвы’’ ненэця’’ лаханаць: «Ӈамгэхэв сит табтомдамбада таняб’’, ханяхав падаӈгур, парадаӈгур. Пуна сёнзянд мюй’ ӈадя’ таӈгамда». Хибяхав мята салм’ мер’ ми’’ман’, хабцяӈгад савуман’, ненвахад ехэраван’ харвась. Падвы’’ вадидо’ саць ӈокаць.
Пуна лакри’ мун’’ сахама’’. Ханяхавад паридена имбытатна парнэком’ мине та’’. Тикэр пяхад сертавы, нимнянда ембдиркана серебтевы. Парнэкорха ӈамгэм’ минена пумна паромбари ту’ ня’ ядаваць. Ӈэвна’’ нимня ӈабтена якэм’ ӈэдараць. Тикахавахад тумдо’ пятадонзь. Сямян вэвакудо’ тун’ парадаць. Ихинандо’ мандараха’’ ӈэ’’нисям’’, нерняӈы ялэна’’ сава’’ ӈэя’’, хусувэй ялява’’ майбцо ӈэя.
Ид’’ хан’’мам’ маниена’’ вадавна ты’’ ниць иры’ 30 яля’ пихина салаба нензахалты’’. Небойханда манэць тюку нарава’’ ямбарка. Пэдара’ поӈгы сыра’’ юван’ ни’’ харва’’. Ялэхэ’’ теци, ханяӈэхэ’’на тамна хадӈэ, мерцяӈэ хан’’ӈа.
Автор: А.Яптик’ падвы
1 минута
30 мая 2024