27,1 тыс подписчиков
✒️ На нашем сайте запущен специальный раздел для старейшей ненецкой газеты «Няръяна Ӈэрм». В нем публикуются новости на ненецком языке.👇
❄️ «Мараӈгам’» няд’’маӈэ мэта’’
Ты ниць иры’ нюртей яляхад едэй няд’’ма’’ ӈадима’ сер’ «Морошка» нюбета картам’ мэта’’ ӈокма’’. Яна’’ тер’’ илам’ сибёмдемба сертадонзь. Ненадовна ӈока нюсавэй мяд’ тер сава таромда манэ’’ӈа’’.
Хурка няд’’ми мэць пирта’’? Падыбахартаб’’, им’ савумдамби’’:
— ӈацекыто’ тохолко мэта ембдяро, паднабцие, тамна тарана ӈаворидамдо’ тэмдавандо’ е’’эмня есядамдо’ ня’’маӈгу’’. Хусувэй ӈацекэн’ 15 ёнар’’ ӈэӈгу.
— школаха’’на тохолкода’’ ӈацекы’’, студент’’ харад’ помна мирци’’ ӈэдалёрта’’.
Тикы няд’’мидо’ мал’’ «Морошка» картавна ня’’ма пиртыдо’. Ӈадьбята мюсерта’’ Ямал’ тер’’ пудана мэва’ хардан’ ха’’мормандо’ сер’ ӈани’’ серото’ хавна «Морошка» картам’ сертаби’’. Сиддо’ ӈэрм’ тер’’ серо минрена департаментхана, управлениеха’’на нядаби’’. Шурышкарской район’ нямна мюсерта нехэ’, Екатерина Озелова няби Юлия Лонгортова, «Морошка» картадамди’ мале сертавэхэ’. Хусувэйнди’ няхар’’ нюда. «Сидя нюми тохолкурӈаха’. 15 ёнар’’ еся хусувэй ӈацекэни е’’эмня ӈули’’ сава няд’’маӈэ тараӈгу’’. Тохолкова’ по’ нерцюна ӈока ӈамгэ тарасеты», — Юлия лахана. Ӈэсынди’ тер’’ Пэ’’ хэё’’ ня’, таӈы мэлвахато’ ямдана пэяд’’. Хардахана сертаванда серодо’ ёльцейдо’.
Няд’’мам’ ня’’амва’ е’’эмня маӈгты’’ иры’ 1 яляхад носиндалава’ иры’ 30 яля’ ӈэсонд’ округна’’ «социальной защита» сайтан’ падарм’ пада тараӈгу. Небянадо’ ня’’амвы есьдо’ ӈарка пэвдей иры’ 31 яля’ ёльцянд’ мэць пиртыдо’.
1 минута
27 мая 2024