9 Май - Җиңү бәйрәмен Мөрәле авылында да зурлап үткәрделәр. Иртәнге якта бар халык авыл уртасындагы мәйданга җыелды. Тантаналы митингны авылыбызның Бөек Ватан сугышы ветераны, Кызыл Байрак ордены кавалеры Фатыйх Шәфигуллин исемен йөртүче яшь армиячеләр отряды ачып җибәрде. Дәүләт гимннары яңгыраганнан соң, сугыш чоры баласы, имам Галимулла абый Гыйбадуллинга сүз бирелде. Кайбыч районы прокуроры Алмаз Сөләйманов, район башлыгы Альберт Рәхмәтуллин исеменнән авыл халкын котлап, Мөрәле җирлегендә яшәүче дүрт тыл хезмәтчәненә, 26 сугыш чоры баласына, махсус хәрби операциядә катнашучыларның әти- әниләренә ихлас рәхмәт сүзләрен җиткерде. Мәктәп директоры Рушания Мозаффарова, ветераннар советы рәисе Лилия Минһаҗева да өлкәннәрне, авыл халкын бәйрәм белән тәбрикләде. Укучылар сөйләгән шигырь юллары, башкарган җыр- биюләре, аналарның улларын сугышка озату, "Вәхшәт" шигырен сәхнәләштереп күрсәткән чыгышлары барысы да тирән мәгънәгә ия иде.