16 подписчиков
✅✅✅#Воҳа_бўйлаб 🇺🇿#VATANHIMOYACHILARI 👨✈️
ХАЛҚ ВА АРМИЯ БИР ТАНУ БИР ЖОНДИР
ДЎСТЛИК тумани Мудофаа ишлари бўлими, Жиззах гарнизони Н-ҳарбий қисм, 524-СЧР батальони ва туман маънавият ва маърифат маркази ҳамкорликда Ўзбекистон Республикаси Қуролли Кучлари ташкил этилганлигининг 32 йиллиги ҳамда Ватан ҳимоячилари куни муносабати билан "Янги Ўзбекистон армияси - мамлакат қудрати, юксак ғурур ва садоқат тимсолидир" шиори остида "Халқ ва армия бир тану бир жондир” мавзусида туманнинг "Бунёдкор" маҳалласи аҳолиси ва ёшлари ўртасида фестиваль ташкил этди.
Фестиваль давомида фахрий қоровул саф тортди. Ҳарбийлар қўл жанги усулларини намойиш этишди. Маҳалла аҳли фестиваль мобайнида замонавий қурол-аслаҳалар кўргазмасини томоша қилишди.
***
ЖИЗЗАХ шаҳри. "Баркамол авод" республика болалар мактабининг чора-тадбирлар режасига кўра Шароф Рашидов туманидаги Н-ҳарбий қисмга экскурсия уюштирилди. Саёҳат давомида ҳарбийлар билан учрашувлар, суҳбатлар ташкил этилди.
Ҳарбий қисм раҳбарининг тарбиявий-мафкуравий ишлар бўйича ўринбосари, майор Эрмамат Турдибоев ҳарбий қисмнинг кун тартиби, ҳарбийларнинг жисмоний ва руҳий тайёргарлигини таъминлаш, янги техника, қурол-яроғларни ўзлаштириш, уларнинг бўш вақтларини мазмунли ўтказишлари учун яратилган имконият ва шароитлар ҳақида сўзлаб берди.
Экскурсияда иштирок этган 200 нафардан ортиқ ўқувчилар ҳарбий қисм спорт майдонлари, полигон ва ошхона, ётоқхоналарини кўздан кечиришди.
***
ҒАЛЛАОРОЛ туманида ҳам “Ватанга хизмат — олий фазилат” мавзусидаги ватанпарварлик тадбири ёшларда катта қизиқиш уйғотди.
Маданият маҳалласидаги Ғаллаорол хизмат кўрсатиш ва сервис техникумида ёшлар, зиёлилар, нуронийлар ҳамда фахрийлар иштирок этган тадбирда Жиззах гарнизони ҳарбий хизматчилари ҳарбийлар ҳаётини акс эттирувчи саҳна кўринишларини намойиш этишди.
Тадбир давомида ҳарбийлар ёшларга қуроллардан фойдаланиш бўйича амалий машғулотлар ўтказишди.
Асад МУСТАФОЕВ.
1 минута
14 января 2024