44 подписчика
28 декабря Православие чтит Трифона Печенгского, Собор Кольских святых
Тропарь преподобному Трифону Печенгскому, Кольскому, глас 8
Пути́, вводя́щаго в жизнь, наста́вник и учи́тель был еси́:/ пе́рвее бо, преподо́бне о́тче наш Три́фоне,/ прише́л еси́ в часть Норве́гския земли́/ и в после́дних конце́х се́верныя страны́ язы́ки просвети́л еси́,/ породи́в водо́ю и Ду́хом Святы́м,/ и свяще́нная твоя́ ча́да в безпло́дней пусты́ни,/ я́ко древа́ ма́сличная, насади́л еси́,/ ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́/ и мона́хов мно́жество собра́в./ Тем, я́ко апо́столом и пустынножи́телем равноче́стна чту́ще тя,/ приле́жно припа́дающе, вопие́м:/ моли́ всех Бо́га за Ру́сскую зе́млю, за о́бласть твою́ и за вся лю́ди,// почита́ющия па́мять твою́.
Тропарь Собору Кольских святых, глас 1
Све́тлый со́нме подви́жников земли́ Ко́льския,/ Се́вера тьму́ сия́нием ве́ры озари́вшии/ отцы́ святи́и, благоче́стием преукраше́ннии,/ служи́телие Та́ин Бо́жиих благогове́йнии,/ боголюби́вии и́ноцы и учи́телие покая́ния,/ миря́не, чи́стым житие́м Созда́телю угоди́вшии,/ язы́ка ло́пскаго богому́дрии просвети́телие и наста́вницы,/ новому́ченицы и испове́дницы, за Христа́ души́ положи́вшии,/ в го́рьких рабо́тах да́же до сме́рти Его́ испове́давшии,// моли́теся ко Го́споду спасти́ся душа́м на́шим.
1 минута
28 декабря 2023