12 подписчиков
Hurmatli yurtdoshlar, qadrli institut professor-o'qituvchilari va xodimlari!
Avvalo, barchangizni O'zbekiston Respublikasi Konstitutsiyasi qabul qilinganligining 30 yilligi bayrami munosabati bilan samimiy tabriklayman!
Aytish lozimki, jonajon Vatanimizda istiqomat qilayotgan har bir inson, har bir fuqaro uchun bu qutlug' sana cheksiz g'urur va iftihor bilan nishonlanadigan unutilmas kundir.
Sababi O'zbekiston o'tgan vaqt davomida o'z Konstitutsiyasi va mustaqilligiga ega suveren davlat sifatida katta taraqqiyot yo'lini bosib o'tdi, jahonda o'zining munosib o'rniga ega bo'ldi, xalqaro hamjamiyat doirasida qo'lga kiritgan yutuqlarimiz munosib e'tirof etilmoqda.
Bosh Qomusimiz mamlakatimizda inson qadrini ulug'lash, erkin va farovon jamiyat barpo etish, inson huquq va manfaatlarini himoya qilish kabi ezgu maqsadlarni o'zida mujassam etgan adolat ramzi sifatida xalq faravonligini ta'minlashda mustahkam huquqiy asos bo'lib xizmat qilmoqda.
Muhtaram ustozlar va murabbiylar!
Bugungi kunda institutimizda ta'lim olayotgan 5 mingdan ziyod talabalarga 1 mingga yaqin siz kabi fidoyi professor-o'qituvchilar va soha mutaxassislari ta'lim-tarbiya berib kelmoqda. Aziz farzandlarimizning o'z huquqlarini to'la anglagan holda, har tomonlama barkamol avlod bo'lib voyaga yetishida siz — qadrli insonlarning o'rningiz beqiyos.
Bu borada institutimizning ijtimoiy kafedralari hamda tarbiya soatlari orqali barcha kafedralarda o'qitilayotgan, tegishli fanlar tarkibidagi mavzularga singdirilgan holda o'tib kelinayotgan Konstitutsiyamiz to'g'risidagi kurslaridagi zarur bilim va ma'lumotlarning ahamiyati katta.
Sizlarga ushbu mashaqqatli faoliyatingizni sharaf bilan amalga oshirishda so'nmas shijoat va katta muvaffaqiyatlar tilayman.
Aziz vatandoshlar, qadrli oliy tibbiy ta'lim tizimi fidoyilari!
Fursatdan foydalanib, sizlarni yana bir bor Bosh Qomusimiz qabul qilinganining 30 yilligi bayrami bilan chin qalbimdan qutlayman hamda barchangizga sihat-salomatlik, oilangizga tinchlik-hotirjamlik, baxt-saodat tilayman!
Hurmat bilan,
Botir Daminov
Toshkent pediatriya tibbiyot instituti rektori
1 минута
8 декабря 2022