9 подписчиков
Мыслі дніа
"Іа идѣх тѫда где сѧ кончаіе град. Іа идѣх шумными улицами, где разноцвѣтни самовозы сѧ превратут в черно-бѣлых ліудеі с очѣсами тѫгы, а огни главнодраг слѣпут очѣсы и лишут разума лѣпотицу-ночі. Идѣх пылными стрѣхами домов, где бездомни коты чуіут шаліену весну, а боіазливи голѫбы сѧ питаіут из рѫк, глѧдѫчи крѫглыма очима за смѣшным несрѫчным человѣком, ке іе принесл в кѣшеніах хлѣб. Идѣх парками, где симетричності цвѣтов іе уточнена до іѫгловатости, але дѣтѧчи смѣх сѧ слыши много частѣі. Идѣх тѫда где сѧ кончаіе град. Натѫде, где мы с тобоіѫ хте сѣдима на брегу моріа и бѫдема глѧдати в міедло червенѧчи виднокрѫг, никѫда не спѣхаіѫчи, разкажѫчи друг другу маличкости, смѣіѫчи сѧ сплатным возпоменам. Але тамо, где сѧ кончал град, сѧ починаше другы. Знову бучѣху самовозы, нѣнакѫде спѣшѣху влакы, ліуды спѣшѣху жити, скидываіѫчи ногами случаіну росу, а ктосі хтеше [скиднути] нас... Мы разлѫчахма краткым утиском дланіу, мы разбѣгахма по справам си, безконечно сѧ одражѫчи в израстаіѫчих всіакомоментно выставах складов, мы говорихма о наі важном, але возлеташе самолет и звѫк гласов наіу таіаше... А послѣ изпаднуше снѣг. Абы ниодкѫде. Акбы чудо. Просто іеднаджы іутром мы пробудихма, изидохма из дому, а град вѧче не іествоваше. Быше степ, звѣздно нѣбо под ногама, быше свѣт и быше тиші. И тогда іесм возглѧдал навіерх, позорно вглѧдываіѫчи в сині, и зразумил іесм, где сѧ кончаіе град."
1 минута
13 февраля 2023