Фольклориада – Өфөлә!
Сара Рәсәйҙә Халыҡтар берҙәмлеге йылына арнала
Бөгөн Башҡортостанда III Бөтә Рәсәй балалар Фольклориадаһы башланды. Маҡсаты – йәш таланттарҙы асыу, ҡыҙ һәм малайҙарҙың ижади үҫешенә юл асыу, балалар араһындағы дуҫлыҡты нығытыу. Сара Рәсәйҙә Халыҡтар берҙәмлеге йылына арнала.
Әйткәндәй, Башҡортостан Башлығы Радий Хәбиров белдереүенсә, Фольклориада – ул халыҡ дипломатияһы, изгелек һәм яҡшылыҡ өсөн кешелекте берләштереүгә уңайлы мөмкинлек. Фольклориадала, исеменән үк билдәле булыуынса, илебеҙҙең бөтә субъекттары ла ҡатнаша, унда бер меңдән ашыу ҡыҙ һәм малайҙың сағыу сығышы көтөлә.
Бик бай программа төҙөлгән. Уның тәүге көнөндә мәртәбәле ҡунаҡтар һәм өфөләр Башҡортостандың Милли музейына сәфәр ҡыла, киске уйында ла ҡатнаша.
Бөтә Рәсәй балалар Фольклориадаһын рәсми асыу тантанаһы 24 июнгә планлаштырылған бик күп рәсми кешеләр һәм хөрмәтле ҡунаҡтар киләсәк. Сарала беренсе тапҡыр дуҫлыҡ һәм берҙәмлек гимны яңғыраясаҡ, көйҙө ике йөҙ тирәһе малай һәм ҡыҙ башҡарасаҡ. Халыҡ-ара конкурстар һәм фестивалдәр лауреаты Екатерина Туйгилдина, "Ассоль" өлгөлө вокал-хореография студияһы, "Чудетство" эстрада балалар йыр театры, "Тамыр" телеканалының вокал студияһы балаларының да иҫ киткес шәп сығышы көтөлә. "Башҡортостан" дәүләт концерт залы алдындағы майҙанда ла концерт буласаҡ.
Кесе йома көнө саунд-чектың, "Фольклор һәм балалар. Традициялар һәм берҙәмлек аша" тигән Бөтә Рәсәй ғилми-ғәмәли конференцияһының ойошторолоуы, "Әй йола" фольклор төркөмөнөң, Башҡортостандың халыҡ артисы Заһир Зәйнетдтиновтың һәм "ZAINETDIN" этно-проектының сығышы күҙ уңында тотола.
26 июндә иһә сараға килеүселәрҙе Башҡорт дәүләт ҡурсаҡ тетарында көтәләр. Совет майҙанындағы сарала хедлайнерҙарҙы күреү бәхетенә ирешәсәк барыһы ла. Мәҫәлән, Рәсәйҙең атҡаҙанған артисы, халыҡ йырҙарын һәм романстар башҡарыусы Марина Девятованың йырҙары олоһоноң да, кесеһенең дә күңеленә хуш киләсәк.
Шуныһы, балалар Фольклориадаһы баш ҡалабыҙҙың бер нисә урынында уҙасаҡ. Совет майҙаны, "Волна", "Демский", "Первомайский" мәҙәниәт һәм ял парктары, Иван Яҡутов исемендәге парк һәм башҡа мәҙәниәт усаҡтары шуға асыҡ миҫал.
Дағстан Республикаһынан ифрат ҙур делагацияның килгәнен хәбәр иттеләр. Ҡыҙлыйорт ҡалаһындағы Әхмәт Зөбәйеров исемендәге өлгөлө халыҡ ансамбленең иҫ киткес шәп бейеүҙәренең йөрәктәрҙе елкендереүендә, Бүрәт Республикаһынан "Черпачок" өлгөлө фольклор ансамбленең театрлаштырылған тамашаһы таң ҡалдырыуында тамсы ла шик юҡ. Сарала берҙәмлекте сағылдырыусы символ ролен башҡорт түшелдереге үтәйәсәк, уникаль әйбер үҙәк урында торасаҡ. Бөтә Рәсәй балалар Фольклориадаһы 26 июндә тамамлана.
Фото: "Культурный мир Башкортостана".