Өфө ҙур сараны ҡабул итергә әҙер
Беҙҙә III Бөтә Рәсәй балалар фольклориадаһы үтә
Был аҙнала Башҡортостанда III Бөтә Рәсәй балалар фольклориадаһы үтә. Хөкүмәттең аҙналыҡ кәңәшмәһендә уны үткәреү тураһында тулыраҡ мәғлүмәт менән республиканың мәҙәниәт министры вазифаһын башҡарыусы Фәнүр Шәйхисламова һөйләне.
23 июндән 27-һенә тиклем Өфө Рәсәйҙең балалар халыҡ ижады баш ҡалаһына әйләнәсәк, беҙгә бөтә илдән 1100-ҙән ашыу йәш таланттар киләсәк. Фәнүр Шәйхисламов белдереүенсә, Рәсәй дәүләт халыҡ ижады йорто үткәргән конкурс һөҙөмтәләре буйынса, ҡатнашыуға илдең 80 төбәгенән, Саха (Яҡут) Республикаһынан алып Калининград өлкәһенә һәм Луганск Халыҡ Республикаһына тиклем, шул иҫәптән Башҡортостандан 1100 ҡатнашыусы саҡырылған. Сарала үҙ төбәгенең фольклор традицияларын үҙләштергән 78 ижади коллектив һәм һигеҙ солист ҡатнаша.
Бөтә Рәсәй балалар фольклориадаһында ҡатнашыусылар – халыҡ йыры, халыҡ бейеүе, халыҡ музыка ҡоралдары һәм традицион мәҙәниәт-фольклор, йолалар һәм милли уйындар кеүек жанрҙарҙа халыҡ ижадын сағылдырған 10-18 йәшлек балалар. Ҡатнашыусыларҙың дөйөм һаны 1200 кеше. Урынлаштырыу өсөн урындар, хәрәкәт итеү өсөн автобустар, объекттарҙы һаҡлау һәм ирекмәндәр корпусы әҙерләнгән, тип билдәләне министр вазифаһын башҡарыусы.
– Беҙгә Рәсәй Федерацияһының һәр төбәгенән 1100 иң һәләтле йәш кеше киләсәк. Был онотолмаҫлыҡ! Алла бирһә, беҙ уны яҡшы үткәрербеҙ, – тине Радий Хәбиров. – Бөтә нәмә ойошҡан рәүештә үтһен.
Сараны сифатлы һәм ойошҡан рәүештә үткәреү өсөн бөтә саралар ҙа күрелде, тип билдәләне Хөкүмәттең беренсе вице-премьеры Урал Килсенбаев. Радий Хәбиров хәүефһеҙлек сараларын көсәйтергә, быға етди иғтибар бүлергә ҡушты. Шулай уҡ кәңәшмә барышында балалар фольклориадаһын асыу көнөндә – 24 июндә тантаналы парад тураһында иҫкә төшөрҙөләр, был ваҡиға өсөн Ленин урамы ҡыҫҡа ваҡытҡа ябыласаҡ.
Фото: БСТ.