Каям, авай! Өле бажың сөөлгү катап чыттап каайн,
Карааң чажын чодуп алгаш, оглуң чагыын дыңнап көрем.
Кайда-чүде чечен черже — чаа-чалбак шөлүндүве
Хайыралыг тыным саткаш, акша сүрүп чоруп тур мен.
Бажында-ла карактыгдан ажыл дилеп, акша дилеп,
Бактың багын көре бергеш, хөйнү бодап,
Кенниң уруг, уйнуктарың түрей бээрге,
Келзе — келзин, барза — барзын кылдыр бодааш, чоруп тур мен.
Сен дег база өле баштыг кадай төрээн үе-чергем
Чечен эрниң сыйда огу мени кедеп чыдар-даа боор…
Каргыс чурттан ногаандыктар былдазынга чазылгаштың,
Караам согур, будум аскак — бертик артар чадавас мен…
Канчап билир, кааң-аяс бир-ле хүндүс казанааңга
«Хары черге күжүр оглуң кара бажын оскунган» деп
Чаңнык ышкаш багай медээ чедип келзе,
Чаштарымның хөңнүн бодааш, туттунар сен.
Каям, авай! Өле бажың сөөлгү катап чыттап каайн.
Карааң чажын чодуп алгаш, оглуң чагыын дыңнап көрем.
Калбак, делгем ыдык Тывам аяс дээрин
Камгалаар дээш, хөрээм ажып, содагланмайн,
Хары черже акша сурааш, тыным салгаш, чоруп тур мен.
Алексей БЕГЗИН-ООЛ
2001, август, Шагаан-Арыг
#шүлүктер
#тывачогаал