Eurostat-ի տվյալներով՝ 2026 թվականի առաջին չորս ամիսներին Եվրամիության երկրների կողմից Ռուսաստանից միջուկային վառելիքի ներմուծումը նախորդ տարվա նույն ժամանակահատվածի համեմատ աճել է ավելի քան հինգ անգամ։
2026 թվականի հունվար-ապրիլ ամիսներին ԵՄ երկրները ռուսական միջուկային վառելիք են գնել 172,6 միլիոն եվրոյի չափով, մինչդեռ մեկ տարի առաջ այդ ցուցանիշը կազմել էր 31,9 միլիոն եվրո։ Ֆիզիկական ծավալներով մատակարարումները նույն ժամանակահատվածում աճել են՝ 253,2 տոննայից հասնելով 280,9 տոննայի։
Ընդհանուր առմամբ, 2025 թվականին ռուսական միջուկային վառելիքի, այդ թվում՝ ուրանի, պլուտոնիումի և դրանց միացությունների ներմուծումը ԵՄ կազմել է 347,9 միլիոն եվրո։ Գլխավոր գնորդներն են Նիդեռլանդներն ու Ֆրանսիան, որոնց բաժին է ընկնում գնումների ավելի քան 90 տոկոսը։
Հունվարին Financial Times-ը հայտնել էր, որ Urenco և Orano էներգետիկ ընկերությունների ղեկավարները Եվրամիությանը կոչ են արել մշակել Ռուսաստանից հարստացված ուրանի ներմուծումից փուլային հրաժարվելու ծրագիր՝ նշելով, որ մատակարարումների շարունակումը երկարաժամկետ կախվածություն է ստեղծում Մոսկվայից։ Թերթը նաև ընդգծել էր, որ Ռուսաստանը շարունակում է ապահովել Եվրոպայի հարստացված ուրանի պահանջարկի գրեթե մեկ քառորդը, իսկ ռուսական վառելիքի համեմատաբար ցածր գինը պահպանում է դրա նկատմամբ պահանջարկը։
Ավելի վաղ Եվրոպական հանձնաժողովը հայտնել էր ռուսական միջուկային վառելիքի և տեխնոլոգիաների նկատմամբ արգելք սահմանելու առաջարկ ներկայացնելու մտադրության մասին, սակայն որոշման ընդունումը հետաձգվել է։ Միևնույն ժամանակ, ԵՄ մի շարք երկրներ շարունակում են ներմուծել ռուսական վառելիք, իսկ Հունգարիան նոր ատոմակայաններ է կառուցում «Ռոսատոմի» նախագծով։
Համաշխարհային միջուկային ասոցիացիայի տվյալներով՝ «Ռոսատոմը» վերահսկում է աշխարհում ուրանի հարստացման կարողությունների մոտ 44%-ը։
