"Гөлназдың намыҫы уяныр тип көткәйнем..."
"Мин бер нисә тапҡыр уның менән бәйләнешкә инеп, аҡса мәсьәләһен үҙ-ара хәл итеүҙе һораным. Гөлназ миңә ярҙам итеүҙән баш тартты, миңә бирерлек аҡсаһы юҡ тине һәм судҡа мөрәжәғәт итергә ҡушты”, – тип яҙған Дилара. Гөлназ Асаева ойошторған аварияла зыян күргән бейеүсе ҡыҙ тағы нимәләр хаҡында һөйләне?
Ошо көндәрҙә селтәрҙә билдәле йырсы Гөлназ Асаева эләккән авария тураһында яңынан тауыш күтәрелде. Хәтерегеҙгә төшөрәбеҙ, йырсының төркөмө менән авария быйыл ҡыш булды. Уның менән бергә машинала ултырған бейеүсе Дилара Ғилметдинова Гөлназдың ошо ваҡытта бер тапҡыр ҙа хәлен белешмәүе һәм аҡсалата ярҙам итмәүе тураһында яҙҙы.
Дилара яҙыуынса, аварияла уның оса башы һөйәге һәм күкрәк ситлеге һынған. Ҡыҙға өс ай буйы дауаханала ятырға тура килгән. Тәүҙә ул Бәләбәйҙә ятҡан, аҙаҡ Ҡазанға күсерелгән, унан һуң Хәрби госпиталдә дауаланған. Дауахананан ул 13 майҙа ғына сыҡҡан, ике ай буйы йөрөй ҙә, ултыра ла алмай ятҡан.
Ҡыҙ белдереүенсә, авария ваҡытында рулдә булған Гөлназ уның хәле менән бер тапҡыр ҙа ҡыҙыҡһынмаған.
“Иң популяр һорау: “Гөлназ Асаева һинең хәлеңде белешәме”? Мин уны һуңғы тапҡыр 7 мартта күрҙем. Туймазыға концерт менән барышлай бөтә төркөм менән инеп сыҡҡайны. Шунан бирле ул хәлем менән ҡыҙыҡһынғаны юҡ. Мине төркөмдән алып ташланы.
Янымда һәр ваҡыт булды. Бәләбәйҙә таныштарыбыҙ ҙа, туғандарыбыҙ ҙа юҡ, шуға күрә ул ҡуртымға фатир алып йәшәне. Гөлназ аҡсалата ярҙам күрһәтергә вәғәҙә иткәйне, ләкин бер ярҙам да алманыҡ. Дарыуҙар менән дә булышманы, ә үҙе бөтә әңгәмәләрҙә “зыян күреүселәргә ярҙам итәм” ти.
Мин бер нисә тапҡыр уның менән бәйләнешкә инеп, аҡса мәсьәләһен үҙ-ара хәл итеүҙе һораным. Гөлназ миңә ярҙам итеүҙән баш тартты, миңә бирерлек аҡсаһы юҡ тине һәм судҡа мөрәжәғәт итергә ҡушты”, – тип яҙған Дилара.
Дауахананан сыҡҡас, ҡыҙ яҡындары менән Бәләбәйгә барған. Унда иһә үҙенең зыян күреүселәр исемлегендә бөтөнләй булмауын асыҡлаған. Ул әле ни бары шаһит булып һанала. Шуға ла ул был турала социаль селтәрҙә һөйләргә булған.
“Был хәлде интернетҡа сығарғым килмәгән ине. Ләкин минең бер ниндәй бәйләнештәрем дә юҡ. Гөлназдың намыҫы уяныр тип өмөтләндем. Ул үҙенең “ысын” тарихын һөйләп йөрөгәндә, минең дә тормошомдо икегә бүлгән ваҡиғаны үҙ яғымдан күрһәтергә хаҡым барҙыр. Бынан ары бер ҡасан да физик яҡтан тулыһынса һау була алмайым. Мин бейеүсе, ләкин элекке кеүек эшләй алмаясаҡмын. Мине лә ишетеүҙе теләйем, ә суд ниндәй ҡарар сығарыр, үҙегеҙ күрерһегеҙ”, – тип яҙҙы ул.
Әйткәндәй, ул үҙенә ауыр саҡта ярҙам күрһәткән Зинира һәм Ризат Рамазановтарға, дуҫтары һәм туғандарына рәхмәт белдерә.
Әле был хәлгә Гөлназ рәсми яуап бирмәне. Кем дөрөҫтер, ваҡыт һәм әгәр Дилара батырсылыҡ итһә, суд күрһәтер...
Фото: Дилараның социаль селтәрҙәге сәхифәһенән.