🇷🇺12 июньдә Ватаныбыз гражданнары Россия Федерациясенең дәүләт суверенитеты турындагы Декларация кабул ителгән көнне — Россия көнен билгеләп үтә🤍💙❤️ Кемгәдер бу өстәмә ял көне, ә кемдер бәйрәм итеп кабул итә.
💫Лариса ӘХМӘТШИНА, Минзәлә районы, Яңа Мәлкән авылы:
— 12 июнь — минем өчен ял көне һәм Ватаным Россиянең бәйсезлеген искә ала торган бәйрәм көне дә. Тарихта үз бәйсезлеген яклап илебез күп тапкырлар көрәшкә, яуга күтәрелгән. Һәрвакыт җиңеп чыккан. Шундый Ватаның белән горурланмый мөмкин түгел! Бу көн шуны искә төшереп, күңелдә горурлык хисен арттыра. Ватан, беренче чиратта, туган авылым, Татарстаным, һәм әлбәттә, бөек Россиябез.
💫Андрей ТЕРЕНТЬЕВ, Мамадыш районы, Кумырык авылы:
— 12 июньнең нинди көн икәнен белмәгән кеше юктыр. Шәһәрдә узган чараларга барырга тырышам. Ә инде рәттән ял көннәренә кушылып китсә, әлбәттә, авылга кайтам. Дөресен генә әйткәндә, гадәти ял көне кебек уза да китә.
Ватан — ул минем өчен, беренче чиратта туган авылым, яраткан Мамадышым, Татарстаным.
💫Павел ЯКИМОВ, Казан:
— 12 июнь — Россиядә зур, патриотик бәйрәм. Ә күпләргә, шулай ук миңа да, өстәмә ял көне. Гадәттә, бу көнне табигатьтә ял итеп, шәһәрдә узган чараларга барып уздырам. Ватан ул туган җир, өең, урамың гына түгел, ә аның кешеләре һәм культурабыз да.
