Борын заманда бер бабай белән бер әби яшәгән. Аларның бердән бер кызлары булган. Әби белән бабай бу кызны бик акыллы, бик тыңлаучан итеп тәрбияләгәннәр. Бер сүз каршы дәшмәгән, ни әйтсәң шуңа күнгән бу бала. Акыллы булган инде. Шулай үсеп буйга җиткән, алма кебек бик матур кыз булган. Бер егет белән гыйшыклары туган.
Ул заманнар шундый булган, кызларга якынлык турында берни сөйләмәгәннәр. Имеш, белмәү - сафлык. Әммә шушы белмәү кызның башына җиткән дә инде. Ул бит бик тыңлаучан булган, сөйгән кешесе сүзенә каршы киләлмәгән. Бик тыңлаучан итеп үстергәннәр инде аны. Һәм белемсез. Ни кылганын белмәгән дә. Шулай итеп буйга узган.
Егетне зинданга салганнар. Юк, сез уйламагыз, аның гаебе булмаган, заманы шундый булган, тотканнар да япканнар. Гаеп бармы-юкмы карамаганнар. Япмасалар өйләнгән дә булыр иде, эчендә кере булмаган, гармуннары уйнап ашыккан гына шул. Ләкин... зинданда килеш өйләнеп булмый.
Әби белән бабайны зур пазур көткән инде. Ләкин болай булмый. Күрәләтә пазурга калып булмый. Аңласалар да: гаеп үзләрендә икәнен, якынлык кылуның нәтиҗәсен кызга сөйләргә кирәк булган икәнен, инде эш узган, терсәкне тешнәп булмый. Ә пазурдан котылырга кирәк.
Инде кыш ае булган. Кызның корсагы беленә башлаган. Болар аңа әйткәннәр, җылырак киен, урманга барабыз. Урманга баргач, эчкәрәк алып кергәннәр.
Син шунда гына тор, без хәзер киләбез, дип кайтып киткәннәр. Кыз бик акыллы, бик тыңлаучан булган. Ата-ана сүзеннән ул чыкмаган. Бик акыллы булган.
"Монда торып туңып үләм бит, кайтырга кирәк," дигән уй башына кереп тә чыкмаган. Көтәргә куштылар. Әйткәнне эшләргә кирәк. "Кайтырга кирәк, туңып үләм бит," дигән сүз керергә уйласа да башына, ул ныклы булган. Ул кайнасына да барып сыена алыр иде. Аның ире үлгән, бердән-бер малай. Кабул итәр иде. "Улым төсе", дип, оныгы өчен генә булса да. "Юк, әти-әни сүзеннән чыгарга ярамый, мин аларны уңайсыз хәлгә куялмыйм", дип, шайтан коткысын кире каккан. Акыллы бала булган инде, аңлаган ана сүзеннән чыгарга ярамаганны, рәхмәт төшкере, ата-анасын җайсыз хәлгә куймаган. Шунда туңып үлгән инде.
Үзе дә, бәбие дә. Шуны ишетеп егет зинданда дөмеккән. Аны инде чыгарырга уйлаган булганнар.
Ә әби белән бабай шушы көннән алып пазурсыз гына яшәп ятканнар.
Акыллы баланың пазуры булмый. Тәрбияли белсәң. Рәхәт ул.
Бетте.