Беҙҙең шихафаналар көтә
2023 йылдан алып Башҡортостан шифаханаларында 9,5 меңдән ашыу МХО яугире һәм уларҙың ғаилә ағзалары һауыҡтырылған.
Башҡортостандың республика ойоштороусыһы булған бөтә һигеҙ шифаханаһы ла Рәсәйҙең иң яҡшы 100 шифаханаһы иҫәбенә инә. Был хаҡта Радий Хәбировтың аҙналыҡ оператив кәңәшмәһендә вице-премьер – ер һәм мөлкәт мөнәсәбәттәре министры Наталья Полянская һөйләне.
Һауыҡтырыу учреждениеларының дөйөм урындар һаны – 3,3 меңдән ашыу. 2021 йылдан алып Башҡортостан шифаханаларын ял итеү өсөн республиканан, күрше төбәктәрҙән һәм башҡа илдәрҙән килгән 405 меңдән ашыу кеше һайлаған. 2025 йылда килем күләме 7 миллиард һум самаһы тәшкил итә, был 2024 йылдан 11 процентҡа күберәк.
– Беҙ заманса медицина ҡорамалдарына инвестициялар һалдыҡ, уникаль тергеҙеү программаларын индерҙек, инфраструктураны һәм сервисты әүҙем һәм талапсан аудитория һорауы буйынса яңынан ҡараныҡ, – тине Наталья Полянская. – Төп капиталға инвестицияларҙың дөйөм күләме 22 процентҡа – 786,6 миллион һумға тиклем артты.
2023 йылдан алып республика шифаханаларында 9,5 меңдән ашыу махсус хәрби операцияла ҡатнашыусы һәм уларҙың ғаилә ағзалары дауаланған. 2026 йылда яугирҙәрҙе шифахана-курорт дауалауын тәьмин итеүгә төбәк бюджетынан 66,5 миллион һум аҡса бүленгән.
Вице-премьер шулай уҡ 2027 йылда Өфөнөң 26 илдән сәләмәтләндереү учреждениелары вәкилдәрен берләштергән “Шифахана” бөтә Рәсәй форумын ҡабул итәсәген хәбәр итте.
Башҡортостан Башлығы шифахана етәкселегенә учреждениеларҙы яңыртыу һәм гуманитар ярҙам күрһәтеү буйынса эштәре өсөн рәхмәт белдерҙе.
– Һалым керемдәре күләме 24 процентҡа, инвестициялар 22 процентҡа артты – был яҡшы һандар, – тип йомғаҡ яһаны Радий Хәбиров. – Эш сәфәрҙәре барышында шифаханаларыбыҙҙың нисек үҙгәртелеүен күрәм. Бөтә директорҙарға ла ҙур рәхмәт. Улар шулай уҡ гуманитар ярҙам, шул иҫәптән яугирҙәребеҙ өсөн эсәр һыу йыйыу буйынса ҙур эш алып бара. Был бик мөһим.
Фото: Башҡортостан Башлығы сайты.