Бүген, 29 апрель көнне, балтачлылар “Фронт һәм тыл бергә: Башкортстан Бөек Ватан сугышы һәм махсус хәрби операция елларында” тарихи патриотик марафонга кушылдылар.
Бөек Ватан сугышында катнашкан ветераннарга, тыл хезмәтчәннәренә, хәзерге вакытта СВОда катнашкан яугирләргә хөрмәт һәм искә алу йөзеннән, ярдәм күрсәтү максатыннан шушы марафон оештырыла. Ватанпәрвәрлек рухын күтәрү һәм тарихи хәтерне саклауга юнәлтелгән чарага балтачлылар да актив кушылды.
Марафонда катнашучыларны район Хакимияте башлыгы Илгиз Субушев сәламләде.
—Марафонда горурлык хисе белән катнашабыз. Районыбыздан 10700 кеше Бөек Ватан сугышына киткән, шуларның 5708е яу яланында ятып калган. Бүгенге көндә 300дән артык балтачлы махсус хәрби операциядә катнаша. Без бердәм булганда безне җиңү мөмкин түгел, —диде ул.
Ары таба телемост аша республика күләмендә марафонны тантаналы шартларда ачу мизгеленең шаһитлары булдык.
Марафонда катнашучылар өчен “Париотизм. Җиңүчеләр буыныннан— геройлар буынына” дигән исем астында түгәрәк өстәл оештырылды. Чыгыш ясар алдыннан марафонда катнашучыларны район мәдәният бүлеге начальнигы Дамир Хәмәтов сәламләде.
—Түгәрәк өстәлнең темасы очраклы сайланмаган. Ул марафонның төп идеясын чагылдыра. Фронт һәм тыл бердәмлеге һәрвакытта Җиңүнең хәлиткеч шарты булды һәм булып кала. Бөек Ватан сугышы елларында якташларыбыз — алгы сызыктагы сугышчылар һәм тылдагы хезмәтчәннәр— бергә Җиңүне якынайтканнар. Бүген дә бабаларыбыз батырлыгы яугирләребезне илһамландыра, —диде ул.
Ары таба түгәрәк өстәл артында сөйләшүләр оештырылды. Районның ветераннар советы рәисе Рифат Сафин Балтач районы халкының Бөек Җиңүгә керткән өлеше хакында сөйләде.
Балтач районындагы “Ватанны саклаучылар” фондының социаль координаторы Гөлшат Нуркаева үзләре башкарган эшләр хакында бәян итте.
Түбән Карыш авылыннан Гыйззәт Суфияров зур әтисе, әтисе, үзе, ике улы —дүрт буынның һәммәсе дә ил алдында изге бурычларын үтәгәннәре хакында сөйләде. Гыйззәт Суфияровның ике улы да СВОда катнашкан. Берсе әле дә анда, ә икенчесе батырларча һәлак булган. “Безнең нәселдә илне саклау— изге бурыч, “— диде ул.
Музейлар яугирләрнең батырлыгын киләчәк буынга җиткерүдә мөһим роль уйный. Иске Балтач 1нче урта мәктәбе музее җитәкчесе Фәридә Шәртдинова, Тучыбай һәм Иске Уразай мәктәпләренең тарих фәне укытучылары Эльвира Зарипова һәм Светлана Шәйхлисламовалар укучыларда геройларга, яугирләргә карата ихтирам тәрбияләү никадәр мөһим булуын ассызыкладылар.
СВО ветераны, Радик Шакиров күптән түгел “Романтик” яшүсмерләр клубында эшли башлаган, ул үз үрнәгенедә туган илне сакларга әзер булуын исбатлый. Шул ук клубның хезмәткәре Гөлнур Сәгъдиева патриотик акцияләр, проектлар турында сөйләде.
Чара ахырында район мәдәният бүлеге начальнигы Дамир Хәмәтов “Бөек елларга баш иябез” күргәзмә экспозициясе белән таныштырды.
Чара үзенең төп максатына иреште— халыкның батырлыгын искә төшерде һәм ватанпәрвәрлек хисен ныгытты.
Рифина НИГАМӘЕВА.