Aziz va muhtaram yurtdoshlar!
Qadrli urush va mehnat faxriylari!
Barchangizni 9-may — Xotira va qadrlash kuni, shuningdek, insoniyat tarixidagi eng ogʻir sinovlardan biri boʻlgan Ikkinchi jahon urushida qozonilgan Buyuk Gʻalabaning 81-yilligi munosabati bilan chin qalbimdan samimiy muborakbod etaman.
Bu sana — shunchaki bayram emas. Bu — jasorat, matonat va Vatanga sadoqat timsolidir.
Bugun biz osoyishta hayot, musaffo osmon va tinch kunlar uchun oʻz jonini fido qilgan qahramon ajdodlarimiz xotirasi oldida bosh egamiz. Ular koʻrsatgan beqiyos qahramonlik va sabr-bardosh har birimiz uchun buyuk ibrat maktabidir.
Ayniqsa, front ortida tunni tunga ulab mehnat qilgan, xalq va Vatan taqdiri uchun bor kuchini bagʻishlagan fidoyi insonlarning xizmatlari ham hech qachon unutilmaydi. Ular tufayli bugungi tinch va farovon hayot barpo etildi.
Bugun oramizda hayot boʻlib, duolari bilan xonadonlarimizga fayz va baraka ulashayotgan muhtaram faxriylarimizga yuksak ehtirom va cheksiz minnatdorchilik bildiramiz. Sizlar — millatimiz gʻururi, jasorat va insonparvarlikning tirik timsolisiz.
Qadrli yurtdoshlar!
Xotira — muqaddas, qadr — aziz. Biz oʻtganlarni yod etish orqali bugunning qadriga yetamiz, tinchlik va hamjihatlikning naqadar ulugʻ neʼmat ekanini yanada chuqur anglaymiz.
Ilohim, yurtimiz tinchligi, xalqimiz osoyishtaligi va xonadonlarimiz fayzu barakasi abadiy boʻlsin! Osmonimiz doimo musaffo, qalblarimiz mehr-oqibatga toʻla boʻlsin!
Bayramingiz muborak boʻlsin!
Soliq qoʻmitasi raisi
Farrux Pulatov
Тelegram |Facebook |YouTube| Instagram |X|Threads
