Беренсе Урал металлургия-тау сәнәғәте форумы була
Ул 21–22 апрелдә Өфөлә уҙа
21–22 апрелдә Өфөнөң «Торатау» конгресс-холында «Фән һәм технологиялар» Беренсе Урал металлургия-тау сәнәғәте форумы үтә. Тармаҡтағы төп йыл ваҡиғаһы Воскресенск баҡыр иретеү заводының 280 йыллығына арнала.
Форум дәүләт власы органдары вәкилдәре, тармаҡ лидерҙары, алдынғы ғалимдар, алдынғы технологияларҙы уйлап сығарыусылар һәм йәш белгестәр араһында диалог өсөн уникаль майҙансыҡ булыр, тип көтөлә. Уның маҡсаты – индустриаль мираҫ буйынса ныҡлы нигеҙгә таянып һәм инновация ҡарарҙары ҡулланып, сәнәғәттең тотороҡло үҫешен тәьмин итеү.
Сәнәғәт сәйәсәтен тормошҡа ашырыуҙа һөҙөмтәлелекте асыҡлаған федераль рейтингта Һуңғы йылдарҙа Башҡортостан Республикаһы алдынғы урындарҙы биләй.
- Бөгөн тау-металлургия тармағы алдында етештереү процестарын технологик яңыртыуҙан алып юғары квалификациялы кадрҙарҙы системалы әҙерләүгә тиклемге амбициялы бурыстар тора, – тип билдәләй Башҡортостан Республикаһы Хөкүмәте премьер-министры урынбаҫары – сәнәғәт, энергетика һәм инновациялар министры Александр Шельдяев.
Форумда кадрҙар әҙерләүгә һәм йәштәрҙе тармаҡҡа йәлеп итеүгә айырым иғтибар бүленә. Новаторҙар һәм стартаптар өсөн инновациялы эшләнмәләр буйынса асыҡ конкурс, шулай уҡ Рәсәйҙә металлургия сәнәғәтен үҫтереү мәсьәләләре буйынса йәштәр ғилми-ғәмәли конференцияһы ойошторола.
Эшлекле программа менән бер рәттән, сарала ҡатнашыусылар геология, металлургия һәм ҡойоу эше өлкәһендәге яңы эшләнмәләре менән таныштыра. Икенсе көнөнә форумда ҡатнашыусылар тарихи майҙансыҡҡа – федераль әһәмиәттәге мәҙәни мираҫ объекты булған Воскресенск баҡыр иретеү заводына технологик турҙа ҡатнаша ала. Ҡунаҡтар «Арт-үҙәк: Воскресенск заводы»н, предприятиеның 280 йыллығына арналған экспозицияны ҡарай ала.
Мәғлүмәт, фото: pravitelstvorb.ru/news/28698/