Апайым мине “ҡара исемлек” кә керетте...
“Арағыҙҙы боҙаһың килһә, кешегә аҡса биреп тор” тигән һүҙ халыҡ араһына юҡтан килеп кермәгән. Таныш ҡатындың үҙе менән булған бер ваҡиғаһы ла ошо турала һөйләй
“Арағыҙҙы боҙаһың килһә, кешегә аҡса биреп тор” тигән һүҙ халыҡ араһына юҡтан килеп кермәгән. Таныш ҡатындың үҙе менән булған бер ваҡиғаһы ла ошо турала һөйләй.
– Апайым менән ғаиләлә ике генә бөртөк үҫтек. Һәр ваҡыт үҙ-ара мөнәсәбәттәр яҡшы булды, ләкин аҡса менән бәйле бер ваҡиға беҙҙе дошманға әйләндерҙе. Апайым менән еҙнәм электән хәлле йәшәне. Еҙнәм Себерҙә эшләгәс, аҡсаны гел мул тотондолар. Ҡала үҙәгендә ҙур йорттары бар, машиналары ла текә. Беҙ ирем менән ябай эшселәр: мин балалар баҡсаһында тәрбиәсе, ирем ябай водитель булғас, аҡсаны иҫәпләп кенә тотонабыҙ. Фатирыбыҙ ҙа ипотекала. Яҡшыраҡ машина алайыҡ, тип тырышып аҡса йыйған ваҡыт ине. Арыу ғына сумманы туплап та өлгөрҙөк. Тап шул ваҡыт апайым өлкән улына ҡаланан фатир алам тип минән аҡса һорап торҙо. “Еҙнәң тиҙҙән отпускыға ҡайта, аҡсаһы күп буласаҡ. Беҙҙең өсөн был сумма күп түгел”, - тип ышандырғас, был хаҡта иремә лә әйтеп торманым.
Үкенескә ҡаршы, был аҡсаны мин башҡаса күрмәнем. Апайым ҡапыл ауырып, дауаханаға операцияға ятты. Ауыр сағында аҡса тураһында һүҙ ҡуҙғатырға ҡыйынһындым. Үҙе лә өндәшмәне. Дауаханан сығып бер-ике ай үткәс түҙмәнем, апайыма бурысы тураһында иҫенә төшөрҙөм.
– Түләүле дауаханала яттым. Бөтә аҡса шунда китте. Һорап алманым бит ул сирҙе. Бирербеҙ, көтөп тор, – тине.
Артабан был хәлде иремдән йәшереп тора алманым. Нисек бар, һөйләп бирҙем. Әлбиттә, был иремә ныҡ оҡшаманы. Тиҙерәк аҡсаны ҡайтарыуҙарын талап итте. Мин нимә эшләргә лә белмәй ике ут араһында ҡалдым.
Тиҙҙән апайым һаулығын нығытам тип, еҙнәм менән ял итергә йылы яҡҡа сығып китте. Ялдан ҡайтҡас, янына барһам, апайым йәмһеҙ итеп әрләп сығарҙы:
– Шул аҡсаға ҡалған көнөң бармы? Аҡсанан башҡа бер нәмә күрмәйһең. Һөйләгәнең аҡса, – тип үҙемде ғәйепле итеп, яманлап сығарып ебәрҙе.
Шул ваҡыттан апайым менән аралашҡан юҡ. Минең шылтыратыуымды ла ҡабул итмәй, “ҡара исемлек” кә кереткән. Ирем судҡа бирергә ҡуша. Минең ҙур тауыш сығараһым килмәй, ҡулымда бер дәлилем дә юҡ. Шул арҡала ирем менән дә аралар боҙолдо, апайым менән дә аралашмайбыҙ. Был хәлдән нисек сығырға ла белмәйем, – тип һөйләне танышым.
Автор фотоһы.