"Аллаһка тапшырдык!"
Рөстәм Нәбиев планетаның иң биек ноктасын — Эверест тавын буйсындыру өчен Непалга килде.
Рөстәмнең тәҗрибәсе зур, әмма мондый куркыныч тау башына ул беренче тапкыр менәчәк. Кичә блогер Эверестка менәр алдыннан акклиматизация узу өчен Лукла шәһәренә юл тотты.
- Луклада барлык бөек альпинистлар үз юлын башлаган. Безнең бурыч - акклиматизация узу, ул Мера Пик тавына (якынча 6500 метр) менү белән тәмамланачак, аның түбәсендә без 2-3 төн кунарга планлаштырабыз. Колясканы кунакханәдә калдырам, аннары инде үз кулларымда юл алам. Бу вакыйга апрельнең 20нче көннәренә кадәр дәвам итәчәк. Эверестка без майда гына барачакбыз, чөнки әле иртә. Безнең юл башлана, Аллаһка тапшырдык! - ди Нәбиев.
Моннан тыш, ул хейтерларга да җавап биргән, алар аны башка кешеләр алып барачак, дип яза. Рөстәм шәһәр буйлап кулларында хәрәкәт итүен, аны халык ничек каршы алуын һәм аның ихтыяр көченә гаҗәпләнүен күрсәтте.